Vawiin chawhma khan CS Conference Hall-ah Chief Secretary Pu Lalnunmawia Chuaungo hovin Civil Services Day, 2019  hmandan tur rel a ni.

Meeting chuan Civil Services Day 2019 puala hun hmanna turah sawrkar hnathawk tha leh entawntlak hnenah ‘Chief Minister’s Award for Excellence in Public Administration’ pek a nih tur thu leh mi harsa leh chanhai zawkte tana thawhhlawk, midang tana thawk nasa tak tak (sawrkar hnathawk ni lo) tan chawimawina sang ‘Chief Minister’s Award for Excellence in Public Service’ pek a nih tur thu a rel a. Chief Secretary Pu Lalnunmawia Chuaungo chuan awardee-te fimkhur taka thlan tur an ni tiin award dawng tlak chiah thlanchhuah tur an ni, a ti a. Sawrkar hnathawkte hi mipuite tana thawk an ni tih inhrilhtharna leh infuihtharna hun atan Civil Services Day hman a nih tur thu a tarlang a ni.     

April Ni 21 hi Civil Services Day puala hman thin a ni a, tunkum hian chawlhniah a tlak avangin April Ni 23 hian Vanapa Hall-ah hman tum a ni a. He hunah hian Chief Minister chu Khuallian atan beisei a ni a. Sawrkar hnathawkte tan ni pawimawh tak niin YMA, MHIP leh MUP member-te sawm an ni bawk dawn a ni.

Meeting-ah hian DP&AR (CSW), DP&AR (GSW), ATI leh I &PR hotute an tel a ni.