No.1114/2020-2020

Vawiin khan Chief Secretary Pu Lalnunmawia Chuaungo hovin Secretariat Conference hall-ah COVID-19 puala Task Group hrang hrang sawrkarin a din te an thukhawm a, inkharkhip thawhlina (Lockdown 4.0) May ni 18, 2020 atanga May ni 31, 2020 thlenga neih tura inkaihhruai dan tur bakah thil pawimawh dang chi hrang hrang an sawiho a ni.

Thil pawimawh chi hrang hrang an sawi zingah hian PMGKY hnuaia Insurance in a cover zingah frontline a thawk COVID-19 natna veite direct contact nilo te insurance in a huam ve theih dan tur ngaihtuah nise tih a ni a, police, VLTF/LLTF leh volunteers te bakah Hospital leh Quarantine Centre hrang hrnga bawlhhlawh la khawmtute leh paihtute bakah a phurtute pawh tel tir dan ruahman ni se an ti a, heng bakah hian sawrkarin hnathawk tura a chhawr ten an hnathawhna hmuna an duty laia COVID-19 an lo kai palh a nih a insurance cover tir dan tur ruahman tha an ti bawk a, hemi lo bawhzui tur hian Task Group on Insurance chu ruat an ni.

Rapid Antibody Test chungchang pawh sawilan niin tangkhang Mizorama lo haw te chu hmun hla tak tak atanga lo haw an nih avangin screening point ah rei tak tak RAT nei tura innghahtir loh dan ruahman ni se an ti a, tangkhang lo haw tur hi an pun belh zel dawn a a lan avangin screening point a medical duty dah pelh a tul a hriat a ni bawk. RAT hi a tira tih bak chu COVID-19 symptoms an neilo a nih chuan tih nawn ngailo tura ngaih a ni a, hei bakah quarantine facility atanga home quarantine tura chhuah phalsakte chu an chhuah hma in RAT tih a tul tih sawilan a ni. Tangkhang lo haw te chu quarantine facility a lut lova home quarantine an duh nghal a nih chuan screening point a RAT non-reactive an nih a ngaih bakah, DC leh an chenna Local/Village Level Task Force te remtihna an lak a ngai thung a ni.

Quarantine facilities bakah tangkhang lo haw te dawnsawnna hmun screening point etc. a duty te tan PPE hak kher a tul lova, sawrkar laipuiin PPE guidelines a siam sa uluk taka zawm a tul thu sawi a ni.

Aizawl khawpui chhunga kohhran hrang hrang 51 laiin an hmunhmate Quarantine Facility atan hman an remtih thu tarlan a ni a, tangkhang lo haw tur hmun hrang hrang ami te hruai haw dan tur pawh sawiho a ni a. Vawiin hian Jharkhand a haw tur hnamdang mi 81 chu Mizoram atanga thawn chhuah an nih thu tarlan a ni.