No.1350/2020-2021
Aizawl, the 24th May 2020 : Vawiin khan Chief Secretary Pu Lalnunmawia Chuaungo leh Sawrkar hotu pawimawh dangten SAD Conference Hall, MINECO- ah phai atanga lo haw mek leh lo haw tur te dawnsawn dan chungchang leh Sawrkarin inkhunghranna hmunhma "Government Quarantine Facilities" a neih sa te thlir hovin heng hmunhma ruahman belh dan tur te an sawiho.
Pu Lalnunmawia Chuaungo chuan Quarantine a dah tur te hi COVID-19 vei anga kan dawnsawn hi a fello a ni, tiin tangkhang lo haw tur te khunghran an nih chhan chu COVID-19 an vei vang ni lovin, COVID-19 lenna hmun atanga lo haw an nih avangin fimkhur thuhlaah Quarantine an ngai a ni, a ti a. Tangkhang lo haw te chu RAT an paltlang (an test a Non-Reactive) a, COVID-19 symptoms an nei lo a nih chauhin Quarantine Facility ah dahluh an ni thin a, RAT a reactive te chu hmun hranah (isolation facilities) ah dah an ni thin a, uluk taka enkawl zui an ni thin, a ti a. Red zone leh containment zone atanga lo haw te chu a theih chin chinah pooling of sample kaltlangin RT-PCR test an nih tur thu a sawi bawk.
India ram State dang ngaihtuahin Mizoram chu a fimkhur bik a, invenna hmanrua tha ber ber kan hmang a, heng te hi za a za diklo mahse tun dinhmunah a aia tha a awm chuang lo a ni, tiin Chief Secretary chuan sawrkarin fimkhur leh uluk thei ang berin hma a lak thu a sawi a. Tunah Quarantine Facilities kan neihsa in lo haw tur zawng zawng te a dawng zo dawn lova, khawtlang leh kohhran hmunhma te Community Quarantine Facilities atan hman dan kawng dap zui zel a tul thu leh inkaihhruaina SOP dungzuia Home Quarantine a theih chin chinah phalsak mai chu thil tul tak anih thu a sawi bawk.
Tourism Secretary & Commissioner leh Chairperson, Task Group on Quarantine Facilities ni bawk Pi Esther Lalruatkimi chuan Quarantine Facilities dinhmun tlangpui sawiin Sawrkar, Kohhran leh zirna inah facilities awm chu a vaiin mi 14000 bawr vel awm theihna a ni a, tangkhang lo haw tur zawng zawng dah nan hian mi 20,000 vel lenna hmun kan mamawh a. Quarantine Facilities te hi a full capacity in hman a theih loh a, tangkhangte hi a tahtawla an rawn thlen avangin a thleng hmasa sa te hi dahluh zel an ni a, an luhfel hnu chuan midang dah a rem tawh thin lova, chuvangin Quarantine Facilities te hi mihring lo thleng tur aia tam zel kan neih a ngai a ni, a ti.
Meeting ah hian Quarantine Facilities neih belh dan leh Home Quarantine chungchang uluk taka sawiho niin mahni in a inkhunghranna nei tha te chu SOP dungzuia Home Quarantine phalsak a pawimawh tiin hemi kawngah hian Task Force te chu in hawng zau turin an ngen a. Meeting chuan khawtlang level ah inkhunghranna hmunhma neih a tul tiin veng/khua zawng zawng te chu Community Quarantine Facilities an neih theih nan hma la tura ngen leh hriattir nise an ti a. Home Quarantine phalna pek chungchangah Task Force te tan hnathawh a awlsam zawk nan an lo endik tur Checklist siam nise an ti a. Quarantine facilities te daihzai zawka hman a nih theih nan veng inthenawm te chu an quarantine facilities neih te an inhmantawm theih nan inremsiam dan kawng dap nise an ti a. Quarantine a awm tur ten mattress tih loh chu mutbu leh tul dang te anmahni intum thin tawh nise an ti a. Heng bakah hian naktuk atanga Lengpui Airport a lo thleng te dawnsawn dan tur te pawh sawiho a ni bawk.
Meeting ah hian Aizawl City Local Council Association leh Mizoram Village Council Association hruaitute pawhin an ngaihdan bakah thil pawimawh leh tul ni a an hriatte zau takin an sawi a ni.
Tun dinhmunah (he report ziah laiin) Sawrkar Quarantine Facilities ah mi 1222, Kohhran Hall ah mi 203, Home Quarantine ah mi 74 leh man chawiin Hotel a mi 7 an awm mek a ni.
Tarlan tawh angin vawiin khan Hyderabad atanga Mizoram lo thleng Telengana state a tangkhang mi 475 an awm a. May ni 26 ah Kerala atanga Badarpur lo thleng tur mi 100 bawr vel an awm a. Ni 28 ah Bangalore atangin Karnataka a tangkhang mi 1500 bawr vel leh ni 30 ah Delhi atangin chutiang zat vel bawk lo thleng tura beisei an ni a. Tunhnaia Meghalaya atanga lo haw tura in report mi 647 te an lo thlen tawh bakah Manipur atangin nimin khan mi 253 an lo haw thleng tawh bawk a ni.
Attachment
- Loading attachment...
