3466/2024-2025

Aizawl dated 11th December 2024: Vawiin chawhma khan Chief Secretary Conference Hall, MINECO, Aizawlah kumin Krismas leh kum thar vuakvet a Assam rifles Canteen kual leh Chanmari kawn inkar traffic tihziaawm nan 'No Vehicle Zone' ruahman dan tur relin thutkhawmna neih a ni a. Pu Khilli Ram Meena, IAS, Chief Secretary chuan thutkhawm hi kaihhruaiin Pu Lalmalsawma Pachuau, Secretary, UD& PA chuan thupui sawi zauna hun a hmang a ni.

Thutkhawmna ah hian Krismas leh kum thar vuakvet a Aizawl khawpui bazar hmun tawt lutuk tur tihziaawm nan leh mipui zalen tak a an bazar theih nan kum 2009 atang tawh a Canteen kual leh Chanmari kawn inkar kawng motor tlan theih loh a ‘No Vehicle Zone’ a puan thin a nih thu tarlan a ni a. Kumin pawh hian December ni 23, 24 leh ni 31 chawhma dar 10 leh chawhnu dar 4 inkar chu ‘No Vehicle Zone’ kalpui leh tur a rel a ni. Aizawl khawpui chhung traffic nghawng ve lohna hmun a lirthei intlanchhawkna kalpui dan ennawn dilna chu Unified Transport Coordination Committee on Traffic Management-ten uluk tak a zirchianna nei tur a tih a ni bawk.

Vawiin thutkhawmna ah hian Director General of Police, Commissioner & Secretary, PWD, Finance department, Secretary, Commerce & Industries, Home department, Land Revenue & Settlement, Information & Public Relations, Law & Judicial, PHE leh Transport Department-te an tel a ni.