Ni 16.12.2017(Inrinni)-a India Prime Minister Pu Narendra Modi Mizoram a rawn tlawh tur chungchangah vawiin chawhnu khan Mizoram Chief Secretary hovin sorkar officials pawimawhten inbuatsaihna kal mek leh tih tur la awmte bakah venhimna leh traffic chungchanga ruahmanna siam tawhte an sawiho.
Ruahman dan chMizoram a rawn tlawh hmasak berna turah Prime Minister Pu Narendra Modi chuan Tuirial Hydro Electric Power Plant a rawn hawng dawn a, hemi rual hian DoNER-in North East Venture Capital Fund hnuaia Cheque dawng tur thlanchhuah 3 te hnenah a hlan dawn bawk a ni. Prime Minister hi Union MoS for Power Pu R.K.Singh leh Union MoS for DoNER Pu Jitender Singh ten an rawn tawiawm beisei a ni a, anni bakah hian state chhungah Mizoram Governor leh Mizoram Chief Minister ten an tawiawm bawk ang. Prime Minister programme hi Aizawl Sipai Lammual-ah neih a ni dawn a, hetah hian sorkar officials leh hnathawk zawng zawngte bakah mipui a duh apiang tel tura sawm an ni.
Prime Minister lo zin dawn avangin ni 16.12.2017 (Inrinni) zing dar 6:00 atanga chhun dar 12:00 inkar chhungin Thuampui Helipad junction atanga Treasury Square inkar via Bawngkawn, Chaltlang, Chanmari, Zarkawt, Dawrpui, Zodin Square, Treasury Square kawngpui sirah lirthei eng chi mah dah/park phal a ni dawn lova; Prime Minister lo tlan lai phei chuan a kawngpui zawh turah traffic zawng zawng din tir an nih dawn avangin mipuite lo inhmakhua tura hriattir an ni a. Lammuala Prime Minister function-a kal tur officials, sorkar hnatahwk leh mipuiten an hriat tur chu Treasury Square leh Lammual chhehvel bial chu Police-in venghimin lirthei eng chi mah tlantlang phalh a nih dawn lo avangin, lirthei keng chuan police an phal chinah inthlah tirin kein Lammual chhung an pan mai tur a ni ang.
