No.1362/2020-2021 

Vawiin khan Task Group on Quarantine Facilities ten Chief Secretary Pu Lalnunmawia Chuaungo, State Level Task Force Chairman hovin Aizawl khawpui chhung veng thenkhata inkhunghranna hmunte an tlawh kual.

Chief Secretary Pu Lalnunmawia Chuaungo chuan Mizoram chu India ram hmun dang zawng aiin a fimkhur a, state dang atanga lo haw te endik vek niin, an fihlim nia hriat hnuah chauh inkhunghranna hmunah kaltir an ni, a ti a. Hetianga test paltlangte hi hmun thenkhatah phei chuan khunghran ngaiah pawh an dah tawh loh laiin Mizoram erawh chuan fimkhur thilah ni 14 kan khung leh vek a ni, a ti. Ni 14 khunghran an nih tawh chuan an chhungte bulah an awm thei tawh a, amaherawhchu, pawn chhuah loh te, mask vuah that leh kut sil ngun te an tih that a pawimawh a, an chhungte nen an fimkhur zui zel a tul a ni, a ti bawk.


Chief Secretary chuan thlawhna hmangin kan Mizopuite an la rawn haw zel dawn a, thlawhnaa chuangte hi test paltlang an nih avangin khunghran ngai lo tih an ni a, hei pawh hi Mizoramah chuan fimkhur thilah quarantine zel an ni dawn, a ti a. Home quarantine chungchang sawiin Chief Secretary chuan inthiarna an intawm loh theih chuan a him a, hmundanga khunghran ai pawhin a him zawk dan a awm a ni, a ti. Inkhunghranna bula chenna in te leh an awmna bul kawnga  kal te chu mi thenkhatten an hlauthawng thin a, hei hi hlauh tur a ni lo tiin  Covid-19 chu boruaka leng a ni lova, khuh leh hahchhiaua chil per leh hnaptui atangtea darh a nih avangin quarantine centre bula kal chu hlauhthawnna tur chhan engmah a awm lo, a ti.
   
Task Group on Quarantine Facilities Chairman Pi Esther Lalruatkimi, Commissioner & Secretary chuan puitling sing chuang khunghranna tur ngaihtuah chu sawrkar tan a hautak hle a, kohhran puihna dil niin quarantine centre siam kawnga kohhranhote inhawnna a ropui hle a ni, a ti a. Veng hrang hranga LLTF leh Kohhranhote tanrualna chu India ram hmundang atanga an lo hriatin Mizoramin fak a hlawh hle a ni,  a ti.  

Task Group on Quarantine Facilities te hian  Electric veng, Venghlui, Republic veng, Venghnuai leh Dinthar venga quarantine facility-te an tlawh kual a. Local Level Task Force hruaitute leh Kohhran hruaituten an lo dawngsawng a ni.

 

Attachment

  • Loading attachment...