Vawiin chawhma khan Chief Secretary Pi L Tochhong hovin Police, Home, Information Communication Technology, Information &Public Relations, Law & Judicial Department-te NEILIT aiawh leh tlawmngai pawl thenkhat aiawhte chuan CS Conference Hall-ah mipuite social media hman fimkhur dan chungchanga inhrilh hriatna kalpui a nih theih ang tih leh social media tangkai zawka mipui ten an hman theih nan engtia hma lak nge tha ang tih chungchang an sawi ho.

Chief Secretary chuan hemi chungchang hi a kaihhnawih Department hova sawi tlan tha tih anih avangin meeting hi koh a ni tiin, social media leh a kaihhnawih chungchangah inhrilhhriatna programme a tam thei ang ber leh a zau thei ang bera neih a pawimawh thu a sawi bawk.

Meeting ah hian Information Technology, a bikin social media chungchang te, social media in nghawng thalo a neih dan chungchangte leh Information Technology kaihhnawih dan leh hrai chungchangte sawiho a ni a. Social media hman fimkhur a tul zia leh hmansual anih in IT dan hnuaia hrem theih an ni tih hi inzirtir a tul zia te sawiho a niin hemi chungchanga hmalak dan hrang hrang te chipchair takin sawiho a ngaituah a ni a. Police hnuaia Cyber Security Cell din a tul thu pawh meeting ah hian sawiho a ni bawk.

Meeting chuan Talk Show, Workshop leh Seminar te leh Awareness Campaign te neih tha tiin Department te chuan heng thil hi ngun taka ngaituah a tan ho a, hma lak dan tur duan tlan tha an ti bawk a ni.