Nimina tan tawh Anthurium Festival 2011 chu vawiin khan Reiek Tourist Complex hmunah hman chhunzawm a ni a, Mizoram Chief Secretary Pu Vanhela Pachuau chu Khuallian niin Festival ni hnihna hi a hmanpui a ni.
Pu Vanhela Pachuau chuan Tourism Department-in kumtin Anthurium Festival mittlung tak an buatsaih thei chu lawmawm a tih thu leh kumin Festival thupuia an hman “Mizoram hi Tourist Hmunpui ah i Siam ang u” tih chu a inhmeh hle thu a sawi a. Tourism chu khawvela sumdawnna lian leh thang chak ber te zing ami a ni tih sawiin Chief Secreatry chuan sorkar leh mimal tan pawn hmasawnna leh hlawkna keng tel Tourism hi Mizoram tan pawh intodelh nan leh eizawn nan a tling thei a ni, a ti. Tourist-te hipna tur chuan remna leh muanna boruak tha tak, hmun fai leh thawveng, hawihawmna, taimakna leh rinawmna a pawimawh a, hengte hi khawvel hmaa Mizote hmingthanna nise, kan ram leh hnam hmu chakin khualzin te kan hip thei dawn a ni, a ti bawk.
Vawiina Anthurium Festival ni hnihna kaihruaitu Tourism Director chuan kalkhawmte lawmna thu sawiin kumina he Festival hi a tum 6-na atan buatsaih a ni theih chu Department hmalakna ni mahse, sorkar atangin tanpuina leh thlawpna tha tak hmuh vang a ni, a ti a. Nakkum atang chuan hunbi neia tih a nih tawh tur thu a sawilang bawk. Hun hlimawm leh zalen tak chhimtu zawng zawngten an hman theih nan duhsakna a hlan bawk a ni.
Tourism Jt. Director Pu Biakthanmawia Pautu-in Kut chanchin tlangpui sawiin sorkar laipuia Ministry of Tourism-in khualzinte hipna tura sum a pek atanga he Festival hi buatsaih a ni, a ti a. Anthurium Festival hi “kut phuahchawp” tia sawi a hlawh thin mai pawh a, state dangte pawhin an state dehchhuah thil hrang hrang fak nan hetiang ang deuha Festival an buatsaih thin thu leh heng hmang hian an state an chawilar bakah khualzin hipna hmanrua tha tak atan an hman thin thu a tarlang a. Anthurium pangpar hi kum 2003 atang khan Mizoramah chin tan a ni a, tunah chuan a len dan leh quality a zirin par khat hi Rs.5 - Rs.15 in an hralhchhuah mek thu leh India ram chhungah chuan Anthurium hi Mizoram ta bik tia sawi thei a ni hial tawh a ni, a ti bawk. Thlaleh November khian Hmuifang Tourist Complex-ah ‘Thalfavang Kut’ leh December thlaah ‘Paihte Festival’ pawh buatsaih a nih tur thu Pu Biakthanmawia hian a sawi a ni.
Anthurium Festival ni hnihna-ah hian Mizo zaithiam lar te leh MCO ten hnamlam chi hrang hrang entirin mipui kalkhawm an tihlim a. Ngharchhip Branch YMA-in ‘Sakei Lu Lam’ hmuhnawm takin an rawn entir bakah Heritage Mizoram-in Mizo handloom hrang hrang pholanna hun ‘Traditional Costume Parade’ an hmang bawk a ni. Fetsival hmunah hian Mizo eisiam leh themthiam thil lei theihin stall engemawzat siam a ni a, chhimtute hlut an hlawh hle a ni.
Naktuk September ni 24 khian a ni thumna leh kharna hun hman a ni ang a, Mizoram Chief Minister Pu Lal Thanhawla chuan Khuallian chan changin a hmanpui dawn a, Tourism Minister Pu S.Hiato chu Khual Zahawm a ni dawn a ni.
