27/2026-2027

Dated Kolasib the 2nd April 2026: Vawiin khan Mizoram Chief Secretary, Pu Khilli Ram Meena chuan Kolasib District a 4 lane kawng laih mek leh tun dinhmuna kawngpui hman lai mek NH306&06 te chu a hmunah kal chilhin, kawng siamtu- NHIDCL leh Contractor te chu a chak thei ang bera an hna la peihfel loh te thawk turin a hriattir.

Chief secretary hian Counter Insurgency and Jungle Warfare School (CIJWS) Vairengte pawh tlawhin hetah hian ram neitute nen ram inhlan chungchanga chinfel leh bawhzui ngai la awm te CIJW hotute nen an sawiho a. CIJW atang hian Kolasib lam pan chho in 4 lane kawng laih mek te leh kawngpui hman mek thawmthat hna kal mek te hi a hmunah a enfiah nghal a ni.

Kolasib DC Conference Hall ah Pu H Dolianbuaia ,Kolasib DC kaihhruaina hnuaiah NHIDCL aiawhte leh Department hrang hrang hotute nen inkawmhona neih chhunzawm a ni a . He hunah hian Chief Secretary chuan National Highway 306&06 thawmthat hna hi hun rei tak chhung thawh a nih tawh hnuah pawh, chhuanlam chi hrang hrang vanga peihfel a la ni thei lo chu pawi a tih thu a sawi a. Nikum lamah pawh he hna hi chak taka kalpui a nih theih nan amah ngei Kolasib-ah kalin hma a lo la tawh a, hemi chungchanga NHIDCL aiawhtenin an tiam anga hna an la hlen chhuak lo chu a lungawithlak loh takzet a ni, a ti.

Hna an zawh theih loh chhan atana an harsatna tarlante chu chhuanlam tlingah a ngai lo tih sawiin, 'Chhuanlam siam tum tan chuan chhuanlam tur a awm reng thin a, amaherawhchu, a taka hnathawh kan hmu duh a ni,' a ti. NHIDCL aiawhte chu an contractor rawihte khauh taka thunun tur leh, tun aia chak lehzuala hma la turin a chah a; he kawng siamthat hna kal mek chu April thla chhung ngeia peih fel vek turin a hriattir nghal bawk a ni.

NHIDCL aiawhten an tarlan danin, Vairengte leh Sairang inkar kawngpui- STMC hna thawh mekah a hmun laipui pathum (Km 42–70, Km 95–118, leh Km 133–147.8) ahte hna hi 100% thawh zawh a ni tawh a ni, an ti a.

Amaherawhchu, hmun thenkhat(Km 70–95, Km 118–133, leh Km 147.8–159), July 2025-a PWD kut atanga an lak erawh kawng a chhiat tawh em avangin a tirah harsatna lian tak an tawk tih sawiin, hemi avang hian an contract hna tak tak an tan theih hmain, lirthei tlan theih hram nan thla thum chuang emergency repair hna an thawh thu an sawi.

Hetianga khawtlai na a awm chung hian, alkatra chhah chi (DBM), concrete phah (PQC), leh kawng lung rem (foundation layers) te phah mekin chak takin hna an thawk chhunzawm zel a; heng kawng la bakah te hian 30% leh 48% hna thawh zawh tawh a ni , an ti a . April 2026 chhungin he thawmthat hna hi peih fel vek turin theih tawp an chhuah thu an tarlang.

Chief Secretary hian Kolasiba NHIDCL aiawhte leh Department hotute inkawmhona a neih pui zawh hian Sairang lam pan in, kawng thawmthat mek hi a en zui nghal a ni.

Vawiina Mizoram Chief Secretary, Pu Khilli Ram Meena in Kolasiba NHIDCL aiawhte leh an hnuaia  contractor te inkawmhona a neihpuina ah hian Kolasib DC Pu H Dolianbuaia bakah Pu Laltlanhlua Zathang, CCF, Mizoram , Pu Lalnunsanga, CF (Northern Circle) , Pu Robin Lalrinawma, CE, Highways, PWD, Pi B Malsawmsangi, Addl DC Kolasib, Pu Vanlalrova Adll DC Aizawl leh Kolasiba Department hrang hotute an tel a ni.