Vawiin chawhma dar 10 khan ATI Conference Hall-ah Senior Level Officer te tan ni 3 - 5 August, 2011 chhung training ‘Ethics and Value in Governance’  hawnna Chief Secretary Pu Vanhela Pachuau in a nei.

Pu Vanhela chuan Senior Officer kalkhawmte hnenah, hun hman dik pawimawh thu sawiin,  kar khatah darkar 48 thawk turin sorkar hnathawkte beisei an ni a, chuvangin traffic jam chhuanlam lo turin hun dik tak a office thleng turin kal hma mai a tul thu te sawiin Mizo hian politeness kan tlachham ta hle a, zir thar leh a tul thu te, mahni aia lal zawk ten biakin thu chung leh kawrhma phelh huai chunga chhan te hi dan lo a ni tih a sawi.

Chief Secretary chuan office leh pawn lam awm dan a danglam thei vak lova,  mahse kan nun kan fimkhur a pawimawh tih a sawi bawk a,  official ni lo pawnlam mi ten file an ken ve mai chi ang te hi rem tih loh tur anih thu leh nawr sek ngai khawpa file kawlrei pawh chin loh tur a ti bawk.