No.4745/2020-2021

Kolasib 4th August 2020: Vawiin chawhma khan Dr H Lalthlangliana, Deputy Commissioner, Kolasib district chuan a pisaah thutharlakhawmtute kawmin, Chief Secretary hnen atanga thu a dawn danin, Vairengte Check gate ah Rapid Antigen test kalpui chhunzawm a nih tur thu a sawi.

Dr H Lalthlangliana chuan mipui himna tur leh thlamuanna turin Sawrkarin ruahmanna a siam thin thu a sawi a, Vairengte Check gate a Rapid Antigen Test pawh tha tak a kalpui chhunzawm a ni dawn tih Chief Secretary atangin thu a dawng tih a sawi bawk a ni.

He hunah hian Pu Vanlalfaka Ralte, SP, Dr Lalhlimpuia, CMO leh Pu Hmingthanzuala, DIPRO te an tel bawk a ni.
Vairengte Check gate ah hian Rapid Antigen Test hi August ni 10, 2020 atanga kalpui tan a ni a, vawiin thleng hian mi 12,044 test neihsak tawh niin ram pawn mi lirthei khalhtu leh handyman 11,458 leh Mizoram mi leh sa 586 te endik tawh an ni a. Covid-19 hri kai 108 hmuhchhuah tawh a ni.

Vawiin vek hian Covid-19 screening point a duty-te hman tur Air Cooler pathum (3) chu Pu Andrew VL Auva, Vice President, MJA Kolasib chuan Dr H Lalthlangliana hnenah a hlan nghal bawk a ni. Heng Air cooler-te hi GIG motors neitu Pu John Lalpeka, David Security Solution neitu Pu David Malsawmsanga leh Khiangte Home Appliance dawr, Diakkawn Kolasib neitu Pu Laldinpuia Khiangte ten duty-te hman atan a an pek a ni. Dr H Lalthlangliana chuan Covi-19 dona kawnga mi inphal te inpekna chu ropui a tih thu a sawi a, MJA Kolasib te bengvarna leh nachang an hriatna chu fakawm a tih thu a sawi bawk a ni. Heng Cooler te hi Vairengte Screening point leh Police duty post a hman tur a ruahman a ni.