No.7448/2020-2021 

Vawiin khan Mizoram Chief Secretary Pu Lalnunmawia Chuaungo chuan SAD Conference Hall, MINECO-a programme buatsaihah online-a project proposal thehluhna leh vil zuina tur Project Management & Evaluation Software (PMES) phase-I a hawng.

Chief Secretary Pu Lalnunmawia Chuaungo chuan PMES software siamna tura hun leh tha sengtute chungah lawmthu a sawi a. Mizoram chu mahni state chhung tharchhuaha innghat thei a la nih loh avang leh hmasawnna hna kan thawh theihna tura kan innghahna pui ber chu Central Sawkar scheme hnuaia project hrang hrang kan thehluh atanga sum hailuh te a nih thin avangin he software hi felfai leh chak zawka department ten project kan thehluh theih nan a tangkai hle dawn a ni, a ti. He software thar hi tangkai taka hmang turin department te Chief Secretary chuan a chah a. A hlawhtlinna tak tak chu a hmangtuteah a innghat dawn a ni, a ti.

PMES hi Planning & Programme Implementation Department leh Information and Communication Technology Department tangkawp buatsaih a ni a, a software hi Mizoram State E-Governance Society siam a ni.  Ministry of DoNER, North Eastern Council, Mizoram State flagship programme SEDP, State Sawrkar project hrang hrang Planning Department-a thehluh tur te chu PMES kaltlanga thehluh tur a ni tawh dawn a. Central Sawrkarin tih leh tih loh tur a bituk te zawm kim loa, format dikloa project thehluh tam tak a awm thin avangin chumi tih bo na tur leh rang zawka hna thawh a nih theih nan he software hi duan a ni.

Vawiina Chief Secretary in a hawn tak PMES software hi a thawhkhatna niin project proposal submit-na tura duan a ni a. Planning Department in verification leh monitoring an tih zuina tur, PMES phase II hi hun remchangah hawn a ni leh ang.

Programme hi Planning Secretary Dr.C.Vanlalramsanga’n a kaihruai a. Pu C.Lalrinfela, System Analyst, Information and Communication Technology Department chuan software nihphung sawifiahna hun a hmang a. Mizoram Sawrkar hnuaia Department hrang hrang hotute an kalkhawm a ni.