Children’s Film Society, India(CFSI), Cinedarbaar leh Directorate of School Education-te tangho chuan May ni 22, 2017 atang khan Mizoram District hrang hrang- Champhai, Serchhip leh Mamit-ahte Film kutpui an buatsaih a, Film kutpui hian May ni 28, 2017 thleng a awh ang. Film kutpui neih chhung hian zirna in hrang hrangah zirlaite tana zirtir nei tha Film hmuhnawm tak tak tihchhuah thin a ni.
He Film Kutpui hawnna hi May ni 22, 2017(Thawhtanni) khan Government Vengthlang Middle School, Champhai-ah neih a ni a, hetah hian ‘Kima Ro Phumruk’(Kima’s Lode) tih film chhuah a ni.
Film dang hmuhnawm leh zirtir nei tha deuh deuh Film Festival chhung hian tih chhuah thin a ni a, National Commission for Protection of Child Rights buatsaih naupangte an dikna chanvo pek leh humhalhsak a pawimawhzia zirtirna lam film pawh tihchhuah thin a ni. Film kutpui neih chhung hian Quiz Competition neih thin a ni a, heta tel naupangte hi lawmman pek zel an ni.
Children Film Society, India(CFSI) hian kan chenna khawvel hmachhawn dan tha leh kawng dik kawhhmuhna tur film hrisel leh hmuhnawm a tichhuak thin a, tawng chi hrang hrang 10-in film 250 chuang a tichhuak thin a ni. CFSI hi Asia chhimlamah chuan naupang en chi film tha tichhuaktu langsar ber a ni a, kum tin ram hrang hranga naupang maktaduai 4 chuang tan film tha an tichhuak thin a ni. CFSI hian naupang film tihhmasawnna turin nasa takin a bei a, India leh khawvel huapin naupang film tihhmasawnna kawngah a thawhhlawk hle.
