Vawiin khan Save Chite Lui Coordination Committee (SCLCC) leh State NSS Office, Mizoram te tangkawpin an huaihawt ‘Chite Lui Thenfai Hnatlangpui Thawhhnihna’ chu neih chhunzawm a ni a. He hnatlangah hian Aizawl khawpui chhunga Higher Secondary School 12 atangin NSS Volunteer 400 chuang an thawkchhuak a. Zirlaite hi School tin atangin Programme Officer thahnem takin an ho bawk a ni.
Hnatlangte hian hmun hnihah inthenin Chite Lui hi an thianfai a. Bethlehem Vengthlang Kaiah hnatlang hawnna inkhawm chu Er. Lalmuanzova, Engineer-in-Chief, PHED in a kaihruai a, Pu Lalmalsawma, IAS, Chief Secretary leh SCLCC-a Chairman ni bawkin hnatlangte hi a vailiam a. Chief Secretary chuan Chite Lui chhanchhuah leh humhalh hna hi mitinte mawhphurhna a nih thu sawiin Mizo mipuiin tangruala kan beih phawt chuan mathei lovin Chite Lui hi lui thianghlim leh chhenfakawm a ni leh dawn ngei ngei ang tih a beisei thu a sawi a. Save Chite Lui Movement-ah tel turin mitin a sawm a ni. Chite Veng Kaiah hnatlang hawnna inkhawm chu Pu Rin Sanga, IAS (Retd.), Vice Chairman, SCLCC in a kaihruai a, Pu Vanlalruata, Central YMA President leh SCLCC-a Vice Chairman ni bawkin hnatlangte hi a vailiam a. Pu Vanlalruata chuan kan rama lui leh tuihna humhalh hi YMA member zawng zawngte mawhphurhna a ni a ti a, YMA member-te chu tichhetu leh tikhawlotu ni lovin humhalhtu leh siamthatu kan ni zel zawk tur a ni a ti.
Chite Lui thenfai hnatlangah hian Aizawl khawpui chhunga Higher Secondary School hrang hrang Govt. Central Higher Secondary School NSS, Govt. Chaltlang Higher Secondary School NSS, Govt. J. L. Higher Secondary School NSS, Govt. K. M. Higher Secondary School NSS, Govt. Durtlang Higher Secondary School NSS, Govt. Mizo Higher Secondary School NSS, Govt. Republic Higher Secondary School NSS, Helen Lowry Higher Secondary School NSS, Synod Higher Secondary School NSS, Govt. Mamawii Higher Secondary School NSS, Public Higher Secondary School NSS, Govt. Zemabawk Higher Secondary School NSS Unit-te an thawkchhuak a ni.
Chite Lui thianfaia NSS Hnatlangpui Thawhkhatna hi September 29, 2017 khan Aizawl khawpui chhunga college hrang hranga NSS volunteer-te nen neih a lo ni tawh a ni.
