No.6930/2020-2021

Lunglei District Level Task Force on Covid-19 meeting ni 11.12.2020-a neih thuchhuak bawhzuiin nimin khan Lunglei DC Conference Hall-ah Christmas leh Kumthar vuakveta hmalak dan tur chungchang inrawnkhawmna meeting neih a ni. Meeting hi Lunglei DC Pu V.Lalsangliana’n kaihruaiin, SP Pu Stephen Lalrinawma leh official dangte, Sub Hqrs YMA hruaitute leh Lunglei Town area chhunga VLTF Chairman-te leh Branch YMA President-te an tel a ni.

Lunglei DC & DLTF Chairman Pu V.Lalsangliana chuan kumin kum tir atanga Covid-19 kan dona kawnga theih tawp chhuaha hnathawktu zawng zawng – sawrkar official-te leh Covid-19 volunteer-te, VLTF, tlawmngai pawl leh kohhran te, Executive Duty zawng zawngte  leh mimal inpe tak takte chungah lawmthu a sawi a. Kan hma lawka hunpui lo thleng tur Christmas leh kumthar vuakvetah mipui an inthlahdah loh nan dan leh thupek kenkawh kawngah theihtawp chhuaha duty uluk taka kalpui a tul dawn a ni tiin kalkhawmte thawhho puiah a sawm a ni.

Lunglei SP Pu Stephen Lalrinawma chuan hunpui chhungin Police te theih tawp chhuahin an duty leh dawn a ni tiin Christmas leh kumthar vuakveta duty turin MAP mi 30 pek belh an nih thu a tarlang a. Lunglei Town area-a veng tinah police in charge pawh ruat fel tawh an nih thu sawiin heng area in charge te leh an supervisor list leh contact number-te chu VLTF leh YMA hruaitu kalkhawmte hnenah hian sem nghalin an mamawh leh harsatna te thlen vat thin turin kalkhawmte a chah a ni. Curfew night duty pawh Lunglei khawpui chhunga lun lai hmun nga (5) ah kalpui mek niin ngawrh tak chhunzawm zel anih tur thu a sawiin VDP-te nen tang hovin Anti Drug Drive pawh neih mek anih thu a sawi.

Lunglei Town area chhunga VLTF Chairman-te leh Branch YMA President kalkhawmte hian an ngaih pawimawh zawng leh Christmas leh kumthar vuakveta duty kalpui an duh dan te an thlen a. Christmas leh kumthar vuakveta duty hi awmze nei taka kalpui anih theih nan pawl hran hranin a hran hrana kalpui lovin veng tin VTLF hmalakna hnuaiah duty hi kalpui ni se tih meeting chuan a rel a. Veng aiawh kalkhawmten he thurel hi tha tiin an pawm tlang a ni.