Vawiin hian Serchhip DC Committee Room ah Christmas leh kumthar lo thleng tur, Serchhip mipuiten boruak ralmuang leh nuam tak hnuaia an hman theih dan tur ngaihtuahin Bawrhsap Dr. Lalrozama kaihhruaina hnuaiah mi pawimawh te an thukhawm. 

Chairman, Dr. Lalrozama IAS chuan, tlem lai deuh va Home Minister hova State Level Meeting-in an lo rel tawh zulzuia meeting chu koh a nih thusawiin, sawrkar chuan mipuite hlim leh thlamuang taka Christmas leh kumthar hmang turin a duh a. Chutianga boruak muanawm tak a awm theih nan chuan khawtlang hruaitute, tlawmngaipawlte, kohhran te, chanchinbumite nena thawhho kan mamawh a ni, a ti. Khawtlang hruaitu kalkhawmte chu hmalakna atana tha an tihte inthlahrung lova sawi tura ngenin, sawrkar mite chu in hmanruakannia, mipui kaihruaitute tha tih chu tihhlawhtlin ngeikantum dawn a ni, a ti. 

Hemi hnu hian SP Pu Lalringdika chuan, Police lam hmalak dan sawiin sawrkar khap thil, halpuah, halmawi leh silai lem a mu neite khaw chhung dawr hrang hrang an vai tan tawh thu leh tun thlenga man tur a la awm loh thu a sawi a. Tin, December thla atanga nasa zawka hma an lak dan tur hrang hrang, dan phal lohva chaka lirthei tlan te, rui chunga lirthei khalhte, passenger phur lirthei khalhtute, leh buaina siam chingte chunga khauh taka hma an lak dan tur ruahmanna te a sawifiah a ni. Hemi hnu hian Excise and Narcotics Superintendent, Pu Rongura pawhin an Department hmalak dan leh ruahmanna te a sawifiah bawk a. Ruihhlo leh dan phal baka zu lei leh hralhtute chunga khauh taka hma an lak tur thu a sawi a ni. 

Vawiina Meeting hian, Branch YMA tinte chu mipuite tanpui tura an vengchhung mamawh nia an hriat ang zela duty tura ngen nise an ti a, veng hrang hranga Street light tha lo laite siam thatte, Tlawmngaipawl leh Police te thawhhona tha zawk awm theih dan turte, kohhran hrang hrang te nena tangruala hmalak ho dan turte leh thil tul dang dangte an sawi ho a ni a. District chhunga sawrkar khap hal chi leh silai lem lut tur dan dan tur leh, dan phal lohva local zu leh asenchi chheprelh leh zawrh ruk awm theite laka hmalak dan turte pawh an sawi ho bawk. 

He meeting ah hian sawrkar officers pawimawh dangte leh Sub-headquarters YMA aiawhte, Village Council hrang hrang aiawhte, chanchinbumi aiawhte an tel a ni.