Vawiin khan Vairengte-a Counter Insurgency & Jungle Warefare School (CIJW) chu Indian Army te tana training chi hrang hrang pea hna an thawh that avangin Chawimawina, Citation Lt. General K. Surendranath PVSM, AVSM, VSM, General Officer Commanding in Chief chuan a hlan. Hlanna inkhawm, Nair Hall, CIJW School-a neihah CIJW Commandant Major General Rajeshwar Singh, SM chuan hei hi a dawng a ni.

Thu sawiin Lt. Gen. K. Surendranath chuan CIJW School chu khawvela rawlrala chetna leh helna chi hrang hrang do tura a hnathawhna ah lawmthu a hrilh a. Heng rawlrala chetna do tura hmanrua leh thiamna tharlam ber ber hmanga hna thawka, training chi hrang hrang leh intuai hriamna te neia khawvela indona awm theite hmachhawn tura sipaite tat hriamtu CIJW school hian an thawk tha hle a, khawvela training hmunpui ber a ni chho mek a ni, a ti. Kum 1995-a kalo kal aiin tunah chuan CIJW School hi a changtlung ta hle a ni, a ti bawk a. He hmun hi India ti hausatu, khawvel pum huapa hmun pawimawh lutuk a ni a. Hmanraw changkang ber bera thuam chhoh zel a ni dawn a ni, a ti a ni.

Tunah hian CIJW School-ah hian India leh ram dang hmun hrang hrang atangin Sipai 200 rual velin training an nei mek a. Fiji, UK, South Korea, Bhutan, Nepal leh Myanmar atangin Army Officer engemaw zat training in an awm mek bawk. CIJW School-a training chhawng tam tak neihte hian ral beihna kawnga inhliam leh chhiatna tawh theih hrang hrang laka inven dan te a thiamtir thin bawk a. Indian Army te bakah khawvel ram hrang hrang atangin training hi neih thin a ni.