2429/2024-2025

Kolasib Dated the 8th October 2024 : Vawiin khan Kolasib DC Conference Hall-ah CIJWS, Vairengte ram chungchungah DC Kolasib kaihhruaina in meeting neih a ni.

Counter-Insurgency and Jungle Warfare School (CIJWS), Vairengte ram luah mek leh ram hauh chin ( Proposed area)  chu kum 2004  atanga khan sipai hmun atan land acquisition hmalakna kalpui tawh a ni a. Amaherawhchu he land acquisition hi bogus claim leh court cases hrang hrang avangtein tih khawtlai a nih bakah LA Act dan ang a kum tam tak a lapsed tawh avangin kalpui chhunzawm a rem tawh lo a,  vawiin thlengin tih fel a la ni lo a ni. Hemi chungchangah hian Defence Estate Office, Guwahati chuan ruahmanna thar siamin, he land acquisition hi tih fel a nih vat theih nan land acquisition hi thuang hniha kalpui turin a ruahman a. A thawh khatnaah CIJWS ram luah chin chu sipai hmun atan lak (acquired) phawt ni se tih a ni. He hmalakna kal zelah hian vawiin khan CIJWS hotute, Forest Department, Revenue Department, DEO, Guwahati aiawhte leh Kolasib DC-te chuan chak zawka hma lak a nih theih nan inbiakna an nei. 

 Kolasib DC chuan CIJWS Vairengte ram luah mek zau zawng te chu Revenue Dept lam chuan GPS Coordinates an neih vek tawh thu a sawi a. He ram lak tur a District Administration in NOC a pek tur chu Mizoram Forest Department lamah zawh fiah ngai te zawh fiah a , phalna hmuh anih hnuah NOC hi pek chhuah a nih tur thu a sawi. Hemi chungchangah hian Forest Dept aiawha tel ACF, Kolasib Division pawhin buaipui ngai te bawhzui kawngah theihtawp an chhuahpui tur thu CIJWS hotute chu a hrilh a ni.

He Meeting-ah hian Kolasib DC Pu Robert C. Lalhmangaiha bakah CIJWS, Vairengte atangin Colonel Mohan Bhalsing leh Lieutenant Bhaskar Sah-te an tel a. Addl. DC Kolasib,  Settlement Officer, Land Revenue & Settlement Department, Kolasib,  SDO(Sadar), SDO(C), Vairengte leh Sub-Deputy Commissioner leh  Environment Forest and Climate Change Department atangin Pu Thanliana Hauhnar, Assistant Conservator of Forest (ACF), Kolasib Forest Division leh Defence Estates Officer Guwahati Circle aiawhte an tel bawk a ni.