Chhiatna lian tham laka Aizawl khawpui sahimna tur chungchanga ruahmanna siam City Disaster Management Plan 2012 zirhona leh inrawnkhawmna chu vawiin nileng khan I&PR Auditorium ah buatsaih a ni a.District Disaster Management Authority Chairman leh Aizawl Bawrhsap ni bawk Dr. Franklin Laltinkhuma’n a hawng a ni.
Inrawnkhawmna hun hi Dr. Lalngura Tlau , Nodal Officer, DM&R Branch, DCs office Aizawl chuan a kaihruai a ni. Consultation meeting hawngtu Dr. Franklin Laltinkhuma chuan hetiang inrawnkhawmna hun buatsaih a nih dan te Aizawl khawpui bik tana ruahmanna siam zirho tura Local Council hrang hrang atanga Locality Disaster Management Committee kohkhawm an nih dan te a tarlang hmasa a. Chhiatrupna thlen chang hian a taka che chhuak hmasa ber chu veng chhung mipuite an ni a. Sorkar lam chu a hnu deuh a thleng an ni thin tiin tunhnaia Aizawl khawpui chhunga chhiatna hrang hrang ah te khan veng mipui, tlawmngai pawl hrang hrang leh sorkar lam thawhhona a tha hle a ni a ti. Aizawl DC chuan a office atanga District Emergency Operation Centre (DEOC) a bungraw neih ang angte thawh chhuahpui a ni thin a ti a, heng hmanraw hrang hrang te hi mamawh a nih anga hawh chhuah theih reng a ni. Amaherawhchu bungraw thenkhat hawh chhuah kir loh a awm zeuh zeuh a, bungraw hawhte hi mahni ta anga en tur leh nakin zela hman tangkai tur a ni tih hre rengin dimdawi tak leh a kim a kir leh turin ngenna a siam a ni. Aizawl Bawrhsap chuan chhiatna a lo thlen in mahni veng bialtu (zonal officer) emaw DC office emaw a rang thei ang bera hrilh hre hmasa ber turin Locality Disaster Management Committee te chu a chah bawk.
Vawiin a inrawnkhawmna hun ah hian Dr. Lallenmawia, Jt. Director, Geology & Mineral Resources Department chuan Aizawl khawpui innghatna leilung chhungril zirchian dan te leh Mizoram pum dinhmun tlangpui a tarlang a ni.
City Disaster Management Plan zirho tura inrawnkhawmna hun buatsaih hi thawhhnih a then niin vawiin hian Aizawl khawpui Local Council 42 atanga Locality Disaster Managment Committee te koh khawm an ni a. A thawhhnihna Local Council 40 dang huapin ni 12 September, 2012 khian Chanmari YMA Hall-ah neih a ni thung ang
