Vawiin chawhnu dar 2:00 pm khan Tourism Minister Pu S. Hiato chuan City Tours & Travels website www.tourismmizoram.com a tlangzarh a, Parliamentary Secretary Pu Lal Thanzara chuan Mizoram Professional & Business Directory 2011 a tlangzarh bawk. He website leh directory hi City Tours & Travels buatsaih niin tlangzarhna hun hi City Car Bazar & Rentals Showroom, Upper Republic-ah hman a ni.
Pu S. Hiato chuan tourism hmasawnna atan Mizoramah tihtur tamtak kan la nei tih sawiin mipui mimir hi khualzin hip tura kan inpuahchah a tul tih a sawi a. Mizoram hi nasa takin a thang a, hma kan sawn a; kan ram chhunga hmun hlui leh pawimawhte erawh hi chu chei danglam lovin a nihna ang chiaha humhalha entir tura buatsaih thiam a tul tih sawiin ram dang atanga min lo tlawhtuten kan nihna ang taka min hmuh an chak a ni a ti a. Pu Hiato hian ram dang atanga lo zin ten Mizo driver te rinawmna an fak thin thu a sawi bawk.

Pu Lal Thanzara chuan hmasawnna hi sorkar kutah kan dah lian em em a; chutih rualin ram hmasawnna atan society leh mimal hmalakna a pawimawh a ni a ti a. Mizoram leilung hausakna haichhuak turin hmun hrang hrangah hma lak mek a ni tih sawiin Meidumah natural gas tam tawk hai chhuah beisei a nih thu a sawi a. Insawiselna ringawt hian thiltha lamah min hruai lem lova; infak a tul huna infak a, inchawimawi a tul huna inchawimawi hian rah tha a chhuah thin zawk a ti bawk.

He tlangzarh inkhawmah hian Parliamentary Secretary Pu Lalrinmawia Ralte te, ZIDCO Chairman Pu Lalrobiaka MLA te, ISTH Mizoram Chapter President Pi Lal Riliani te bakah a kaihhnawih sorkar officer thenkhat an tel a. Kalkhawmte lawmna thu sawiin he firm neitu Pu Rochanmawia chuan Mizoram chanchin pawn lama mawi taka pho chhuah leh Mizo thalaite tana hna siam an ngai pawimawh tih a sawi.