No.2239/2020-2020 

National Health Mission, Mizoram hmalakna in Civil Hospital Lunglei (CHL)-a Biosafety Level-2 laboratory ah Covid-19 hri endik tura swab sample test-na atana hman turin Molbio Truenat khawl chu tun thla (June, 2020) hian bun fel a ni a. 

Lunglei District-a tangkhang lo haw quarantine mekte Swab Sample test na atan he Truenat khawl hi June 12, 2020 (Friday) atang khan hman tan a ni a. 

He khawl hman tan 12th June 2020 atanga nimin 19th June, 2020 thleng khan Sample test tawh zawng zawng hi 92 niin heng zinga sample 91 te chu negative in, sample pakhat positive result hmuhchhuah a ni a. Truenat khawl hmanga Positive result hmuhchhuah hi Designated Covid Health Centre (DCHC), ETC SIRD, Pukpui a khunghran mek a ni.

Tuna Truenat Khawl hman mekah hian Covid-19 positive result nemngheh na (confirmatory chip) a awm rihlova. Chuvang chuan positive hmuhchhuahte hi ZMC ah confirm tura thawn phei a ngai a. Tuna positive pakhat hmuhchhuah pawh hi ZMC Laboratory-ah confirm tura thawn phei mek niin result ngaih chan mek a ni a.  

Tin, Covid-19 positive result nemnghehna Confirmatory Chip hi CHL Laboratory ah neih thuai beisei a ni. 

CHL Laboratory ah hian swab sample test hi Dr. RSC Vanlalruati, Microbiologist kaihhruaiin nitin kalpui tawh niin Truenat Test result hi DIPR kaltanga nitin zing dar 8:00-a puan zar thin tum a ni.