Vawiin khan Agriculture Department buatsaihin sikleh sa inthlak danglam (Climate Change) chung chang zirhona hun buatsaih a ni a. He zirhona hunah hian Agriculture Department, Land Resources, Soil & Water Conservation Department leh Fisheries Department-a Officer te bakah Central YMA leh AMFU aiawh te an tel a. Meghalaya leh Nagaland atanga lokal mithiamten he hun hi an chhim bawk a ni.
 
Sik leh sa inthlakin nghawng a neih hrang hrang leh chumi tiziaawm tura hmalak dan tur zirhona hi Pu Rohmingthanga Colney, Director, Agriculture (Crop Husbandry)Department-in a kaihruai a. Pu Rohmingthanga Colney chuan Climate Change kaihhnawiha Agriculture Department hmalak mekna te a sawi a. Sik leh sa inthlak danglamin loneitute tan harsatna a siam theih dan te a sawi bawk.

IPE Global, New Delhi atanga mithiam lo kal Dr. S.Satapathy, Consultant chuan kalkhawmte hmaah thu sawiin khawvel sik leh sa inthlak danglam mek hi ngaihthah mai chi a ni lo va, hei hian kawng hrang hrangin mihringte tan harsatna a thlen theih avangin kan buaipui takzet a ngai tawh a ni a ti a. Khawvel lumna (temperature) hi a sang zel a, ruah sur dan a mumal lo tulh tulh bawk a. Chutih laiin mihring leh thlaiah natna leh eichhetu rannung an pung tulh tulh bawk a. Ramngaw a tlem tulh tulh avangin boruak thianghlim, mihring leh ramsa ten kan mamawh chu a tlem ve zel bawk si te hi ngaihthah mai chi a ni lova, mihring kan pun zel avangin ei leh bara kan mamawh zat pawh a pung ve zel a, ram bial khata buh leh bal kan thar zat erawh a pung ve hlei thei tawh si lova. Ram kan siam belh thei lova, kan ram neih ang ang hi a hman tangkai dan kan ruahman zel a tul a. Sawrkar laipuiin NAFCC (National Adaptation Fund for Climate Change) Scheme hnuaia a kalpui mek, 'Sustainable Agriculture Development Mission' chu chak tak leh phur taka Agriculture Department pawhin a kalpui a ngai a ni, a ti.

He hunah hian sik leh sa in kan ram a nghawng dan leh sik leh sa avanga harsatna kan tawh hrang hrangte zirho a ni a, heng harsatna te dolet a, kan phak ang tawk zela boruak chhe zel tur laka kan in ven theih dan turte sawiho a ni.