Vawiin khan Pu P.L. Thanga Vice Chairman NLUP Implementing Board hovin NLUP Conference Hall ah NABARD hotute, Kolasib leh Mamit District atangin D.C. te, Project Director DRDA te, BDO te leh NLUP Line Department Officer-te leh NLUP Implementing Board Officials ten Kolasib leh Mamit District a Cluster Development hmanga NLUP kalpui dan tur an sawi ho.

Cluster Development in a turn chu NLUP hmalakna hrang hrang awmze nei leh hlawmkhata mumal zawka thawh dan tur ruahman a ni. Land base activity (leilung behchhana eizawnna) lamah NLUP dawngtute te an tharchhuah tihpun a, an thawhchhuah hlawk zawka a rah an seng theihna tura ruahmanna a tel a. Thlai puitling har, hun rei deuh zawk nghah ngai te pawn (e.g. Rubber, Coffee. Mau. etc.) a puitlin an nghah chhunga an lo thawh tel tur hna dang ruahman sak pawh a tel. Heng an tharchhuah dehralna (marketing) lamah pawh harsatna a awm loh nan kalhmang awmze neia ruahmanna duan a ni a. A hlawm a mumal taka hralh chhuah theih tura inbuatsaih a ni. Cluster Development programme hnuaiah hian irrigation, market shed leh godown sak te pawh a huam tel dawn a ni.

Hemi tihlawhtling tur hian Sorkar Department scheme neihsa leh NABARD nena tang kawpin thawh a ni dawn a, Kolasib District atan Rs. 112.74 crore leh Mamit District tan 85.61 crore ruahman a ni.