2813/2025-2026

Dated Aizawl, the 7th January, 2026 : Vawiin chawhma khân Chief Minister Pu Lalduhoma chuan MINECO-ah Engineers’ Centre sakna tur Lungphûm a phûm.

Chief Minister Pu Lalduhoma chuan he lung phum programme-ah hian thusawiin, Mizoram Engineering Service Association (MESA) member-ten Engineers’ Club sakna tura sum an thawhkhawm chu fakawm a tih thu leh entawntlak a tih thu a sawi a. Sawrkar Engineer-te chu kan ram hmasawnna ruhrel dinna kawng tinrenga a mawhphurtute in ni a, in kutah hmasawnna hnathawhna tur sum pawh a lut hnem a, inpe zo taka hna in thawh hi kan beisei tlat a ni, a ti a. Infrastructure tha pakhatin kan economy a nghawng theihzia chu rel kawng atang hian a hmuh theih thu sawiin, Sairang thleng rel rawn lut chuan mipui nawlpui tan zinchhuah a ti awlsam a, kan sumdawngten man tlawm zawkin bungrua an lalut a, khualzin rawn lut an tamin Tourism Industry a kan phah thu a sawi a. Hei hian infrastructure tha hlutzia min hmuhtirin, Engineer kalkhawmte chu kan ram hmasawnna tura dik tak leh tha taka hnathawk zel turin leh he Engineer’s Club hi an hnathawhna lama tangkai taka hmang turin duhsakna a hlan a ni.

Chief Minister chuan Mizoram chu eirukna lakah pawh kan fihlim tlan thu sawiin, CMS India Study chuan NITI Aayog leh Transparency International data-te atanga an teh danin, tunah hian Mizoram hi India rama eirukna tlem lama pahnihna kan nih thu a tarlang a. Pakhatna chu mihring sing sarih vel chauh chenna Laksadweep (Union Territory) a ni a, State zingah Mizoram chu pakhatna kan ni a. Works Department-te kalphung zirchiang a, kalphung tha zawk siamtu tur Study Team din a nih thu leh an report pawh thlirho a nih tawh thu Pu Lalduhoma chuan a tarlang a. Study Team-in tha zawka hmalak dan tur leh insiamthatna tur rawtna an neihte bawhzuia Works lama kan kalphung tam tak hi a tha zawnga tih danglam tum a nih thute a sawi bawk a ni.

Engineer-te hian Zarkawt Babu tlângah Engineers’ Club changtlung tak an nei thin a. Engineer-te inthlunkhawmna pawl ‘Mizoram Engineering Service Association (MESA)’ chu Department hrang hrang awmkhawm an nih avangin chu hmun chu an hna chungchang sawiho nânte, Conference neih nânte, Aizawl pawn lama posting nei tân Headquarters dawra Aizawl an rawn kal chânga thlen nânte leh thil ṭul dang chi hrang hrang atan an hmang ṭhin a. Kum 2011 khân sawrkar-in Engineer-te building leh ram chu Zarkawt YMA hnenah Stadium cum Recreation & Parking Centre atan a pek tak avangin Engineers te chuan hmun leh building an nei ta lo a. Hmunhma pe leh tura vawi tam tak thuneitute an dil hnuah June 12, 2024 khân sawrkar chuan MINECO-a plot no. B-39 chu Engineers Centre atan a pe ta a ni.

Engineers’ Centre hi sak puitlin a nih hunah chuan Engineer-te tân chauh nilo, sawrkar department hrang hrang te, sawrkar hnathawk Association hrang hrang te, NGO, Kohhran leh mimal thlengin a mamawh apiang tan hman theih tura buatsaih tum a ni a. Engineer-te bik chuan seminar leh conference neih nân te, Works Department hrang hrang kârah thawhho dan tur sawikhawm nân te, technical thila inrawnkhawm nân te, senior member te’n junior zawkte hnena an hnathawhna kawnga an tawnhriat inhrilh nân te, technical mite tâna ṭangkai tur lehkhabute daha technical library anga hman atante, codes, manual, technical paper leh journal hrang hrang dahkhawm nân te, training neih nân te, Aizawl pawn lama awm engineer-te’n headquarters an rawn dâwr chânga thlen nân te, transit accommodation leh a tul dang atante hman tur a ni ang.

Vawiin lung phum programme hi Er. Lalrinzuala Ralte, President, MESA, chuan a kaihruai a, Er PC David Lalrinliana, General Secretary, MESA hnen atangin report ngaihthlak niin, Er Lalrinmawia, Chairman, Engineers’ Centre Working Committee chuan lawmthu sawiin hun a khar a ni. Engineers’ Centre sak turah hian mi 500 len theihna Conference hall a awm dawn bakah technical discussion room, family transit accommodation, committee room, guest room, canteen leh motor parking te a awm dawn a ni. Engineer-te hian an Centre sakna atan hian Rs. 21,83,000/- an thawhkhawm tawh a, thawh zel pawh an tum a ni.