No.1966/2021-2022

Aizawl the 23rd August, 2021: Vawiin khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm a. Lockdown puan chhunga harsatna tawk, chhuanchhamte tanpui nan leh COVID-19 hri vei te enkawlna atan cheng nuai zahnih sawmkua pahnih leh sing ruk (Rs. 2,92,60,000) semchhuah an remti.

He committee-ah hian Addl.Chief Secretary Pu JC Ramthanga chu Co-Chairman niin, Finance Commisioner Pu Vanlalchhuanga chu Member Secretary a ni a, tlawmngai pawl NGO Co-ordination Committee aiawh Pu Vanlalruata CYMA President leh Mizoram Kohhran Hruaitute Committee (MKHC) Secretary Rev R.Lalrinsanga te chu member niin, vawiin meeting-ah hian an tel kim vek a ni.

COVID-19 hrileng laka mipui an him theih nan hun rei tak inkhuahkhirhna kalpui avanga eizawnna hna thawk chhunzawm theilo, harsatna nasa tak tawk an awm thu meeting-ah hian sawi niin, a bik takin AMC area huam chhungah chhawmdawl ngai an tam thu report a ni a. District hrang hranga COVID-19 veite enkawlna hmuna mamawhna hrang hrang awmte sawi ni bawkin, heng atan hian Chief Minister's Relief Fund for COVID-19 atanga chhawmdawlna pek remtih a ni.

AMC huamchhunga chhungkua 7,330 chhawmdawl nan Rs. 1,46,60,000 (Rs.2,000 theuh in) pek remtih a ni a. Hemi bakah hian district tina hrileng veite enkawlna hmun hrang hranga a tul anga hman turin an DC te theuh kaltlanga chhawmdawlna pek remtih ni bawkin, hemi atan hian Rs. 1,46,00,000 sanction a ni.