Khuallian Pu J.H. Rothuama chuan thusawiin Mizoramah Cooperative Society dinna a rei tawh hle nachungin hmalakna tur a la tam hle a ni, a ti a. Sorkarah ringawt innghat lova mimal leh society ang pawhin tan lak a pawimawh a, chu chuan sorkar a cho chhuak zawk dawn a ni, a ti bawk. Mizoram sorkar chuan kumin October atangin NLUP bultan a tum thu sawilangin Minister chuan mi engemawzatin ranvulh / vawkvulh an thlan ngei a rin thu a sawi a, hemi atan hian vawk note tam tak an mamawh dawn avangin PIGFED memberte pawhin hei hi chonaah ngaiin vawk note mamawh phuhruk thei turin tan la turin a chah. Mizoramin state dangte umpha tur chuan loneitu/kuthnathawktu ten mahni puala ram an neih a ngai a, hei hi hriain sorkar chuan NLUP hnuaiah ram nghet pek a tum thu a sawi a. Amaherawhchu an ram dawnte hralh leh phal a nih loh tur thu leh ram ngah lutukte chu an ram lak thensak (land ceiling) a ngai hial mai thei a ni, a ti bawk. Tunlai khawvelin a buaipui em em boruak inthlak danglam chak lutuk, sik leh sa awmze nei mumal tawh lo chu Mizoramin kan pumpelh theih nan kan ramngaw te humhalh that a, thingphun pawh kan uar leh zual a tul a ni, a ti. Ram hmasawnna atana sorkar thlawp chunga thahnemngai taka thawktu ni zel tura chahin Minister chuan Assembly hlimawm tak an neih theih nan PIGFED member zawng zawngte chu duhsakna a hlan a ni.                                                                 

  Assembly hawnna inkhawma tel ve AH&Vety. Director Dr.L.B.Sailo pawhin thusawiin NLUP hnuaiah vawk note sing khat aia tam mamawh turah leh ranchawa intodelh nan vaimim chin uar lamah PIGFED-in tanlak a ngai a ni, a ti a. Tun hnaia Mizoram hmun hrang hranga vawk pul hri a len chungchangah department-in chak takin hma lain hri danna vaccine pawh chah thlen a nih tawh thu leh district hrang hrangah sem mek a nih thu a tarlang a. Mizoram hmun hrang hranga AH&Vety. Department-in ram a neihte chu fel taka chhinchhiah a, land lease pawh siam thuai a nih tur thu te a sawifiah bawk a ni.

Mizoram Pig Producers’ Cooperative Federation (PIGFED) Ltd hi kum 1988 khan din niin, a hnu kum 1989, 6th June-ah Cooperative Act hnuaiah Registered a ni a, kumin hi registered society a nih atanga kum 20-na a ni. PIGFED hi Mizoram pum huap niin tunah hian Primary Society 120 lai an awm mek a ni. PIGFED in a tum ber chu vawkvulh leh a kaihhnawih thil hrang hranga hmasawnna tura hmalak te, society hrang hrang hemi kawnga kaihhruai leh zirtir te a ni a. A din tirh atangin vawkvulh lamah hmasawnna pawh thuk tak nei tawhin, kum 2008-2009 chhunga hlawkna (Net Profit) an hmuh zat chu Rs.5,43,233/- a ni.