No.3065/2020-2020

Aizawl, the 14th July 2020 : Vawiin khan Agriculture Minister Pu C. Lalrinsanga, Cooperation Department enkawltu ni bawk chuan RCS Meeting Hall, PWD Tlang, Zarkawt ah tlangmi kuthnathawktute tana buatsaih Prime Minister Van Dhan Yojana (PMVDY) Mizorama a bul tanna turin he programme hi a hawng.

Cooperation Minister Pu C. Lalrinsanga chuan PMVDY chu thingtlanga kuthnathawktute leh miharsa te chawikanna tur hmanraw pawimawh tak a nih a beisei thu sawiin a bultanna tur vawiina hawn a ni ta chu lawmawm a ti a. Cooperation Department chu mipui tana Department pawimawh tak a nih dante , hlawhtlinna an neih te sawiin Minister chuan Cooperative Movement chuan khawvel hmun hrang hranga an ram hmasawn zel na turin an thawhhlawk thin hle ni a ti.

Minister chuan Sawrkar Laipuiin Cooperative Movement kaltlanga hmasawnna thlen tir a ngai pawimawh hle tiin hemi kawngah hian a in hawng hle a, chuvangin Mizoramah pawh nasa zawka hma kan lak a, PMVDY hi kuthnathawktuten tangkai thei ang ber leh an hlawkpui theih zawk nan kan kalpui a pawimawh dawn a ni, a ti a. He Scheme hnuaia sum thawh dan tur funding pattern 75 : 25 Central Sawrkar in a ruahman chu 90:10 a kalpui a nih theih nan Central Sawrkarah ngen a nih thu a sawi.

Pu C. Lalrinsanga chuan PMVDY hnuaiah ram ngaw atanga, thing ni lo, thil dang lakkhawm Minor Forest Produce (Non-Timber Forest Produce) ah ramhmul damdawi Mizorama awm ang ang te pawh hawl tela kuthnathawktuten an hlawkpui theih nan ngaihtuahna sen a tul tiin hemi kawngah hian MZU lama mithiamte chu rawn an nih thu pawh a tarlang a ni.

Vawiina PMVDY hawnna programme hi Pu Lalrinsanga, Registrar of Cooperative Societies chuan kaihruaiin Pu K. Lalruatfela, State Nodal Officer, Van Dhan Mission hnen atangin Report ngaihtlak a ni a. He hunah hian Pu J.P. Agarwal, IAS, Commissioner & Secretary, Cooperation Department pawhin thu a sawi a ni.

Mizoramah PMVDY hi Cooperation Department in an kalpui dawn in Nodal Department an ni a. He Scheme hi Mizoramah kalpui anih theih nan Department chuan Ministry of Tribal Affairs hnuaia Tribal Cooperative Marketing Development Federation Ltd. (TRIFED) nen kumin January khan thawhhona thutlung an ziak a ni.

He Scheme hi tlangmi kuthnathawktuten an thar chhuah chi hrang hrang, a bik takin ramngaw atanga kan lakkhawm, Minor Forest Produce ( Non-Timber Forest Produce) te hi a raw material anga hralh lovin, a hlutna belhchhah hnuah hlawk zawka hralh anih theihna tura Sawrkar laipuiin State sawrkawr kaltlanga a hmalakna a ni a. Tribal-ten MFP an lakkhawm reng reng man man taka hralh a nih theih nan Minimum Support Price(MSP) hi India ram pum a hman turin Minstry of Tribal Affairs chuan a ruahman a. Tunah hian MSP list 73 items a awm mek a ni a. Hemi list a la tello, Mizoram chhunga kan hmuh leh hralh theih ang chi thil 22 chu MSP list a telh turin hmalakna kalpui mek a ni. MSP-MFP scheme hnuaia MFP lakkhawmna tur atan Procurement plan siam tawh a ni a, MoTA lamah TRIFED kal tlangin theh luh tura buaipui mek a ni.

He Scheme bul tan nan Mizoram a District 7-a Cooperative Society 44 chu Van Dhan Vikas Kendra (VDVK) atana thlan chhuah an ni tawh a. Hemi atan hian TRIFED chuan RS. 581.55 lakhs a rawn sanction tawh a. He scheme hi Mizoram pumah kalpui thuai turin chak taka hmalak mek a ni.