Coca Cola Under-14 football tournament North-East zone chu Mizoramin thlengin, vawiin khan Champhai Chhangphut field-ah khelh tan a ni. He tournament hi Champhai DC Pu Zoengsanga chuan hawngin, boruak muanawm tak kara infiamna hun tha tak an neih theih nan leh team chak ten chak dan thiam a, a chaklo zawk pawhin chak lohva awm dan thiam turin inkhel turte chu a chah a ni.

Khuallian Pu Zoengsanga chuan vawiin inkhel chu Champhai District-a la thleng ngailo a nih thu leh lawmawm a tih thu a sawi a. India hmarchhak state atanga inkhel tura lo kal zawng zawng ten Mizoram an cham chhungin hun nuam tak an hman a duhsak thu leh team inkhel zawng zawngten an theihtawp an chhuah a, an hma hun zelah pawh hlawhtlinna an neih a beisei thu a sawi bawk.

Kum 2017-a FIFA U-17 World Cup India in a thlen tura India team a tel tur thlan nan tuna zonal tournament hi buatsaih a ni a. Zone tin a team tithate chu Inter-Zonal tournament-ah an intum leh dawn a ni. North-East zone-ah hian Mizoram bakah Meghalaya, Manipur, Assam leh Tripura an tel dawn a. Vawiin hian Mizoram Team leh Assam Team intum in tournament hi tan a ni a. He tournament-ah hian player tha bik tur enthlatu Player Spotter a lo kal bawk.