Vawiin chawhnu khan Committee on Local Fund Accounts (COLFA) leh Lunglei khaw chhunga Village Council member-ten Lunglei Circuit House-ah inhmuhkhawmna an nei a. Law Commission Chairman leh COLFA Chairman ni bawk Pu John Siamkunga, MLA in a kaihruai.

Pu John Siamkunga chuan COLFA chu audit report behchhanin hnathawh reng reng a thu mai ni lo a, a hmunah kal a sum mil in hna thawh a nih leh nih loh endik an tum thu a sawi a. Mipui hmasawnna atana sum rawn kal reng reng chu a zahawm in, dik taka hman chu kan tih tur a ni, a ti a. Ram hmasawn zelna ah theihtawp in corruption umbo an tum tiin, thil diklo titute erawh an ngaidam thei dawnlo a ni, a ti.

Pu Lalthanliana, MLA pawhin sawrkarin thil dik leh tha zawk a duh avanga Committee on Local Fund Accounts din a ni, a ti a. Committee din chhan te hria a, kan fimkhur lehzual nan leh hna tha zawka kan thawh theih nan Committee-in inhmuhkhawm hi a ngai pawimawh hle a ni, a ti.

Pu R. Vanlalvena, MLA chuan State leh UT dang ten kan report an hmuh ve vek thin avangin, hmel a mawilo sam in, VC atang pawhin thangthar leh kan state ti mualpho tu nih a awlsam hle a ni, a ti a. Heng in tih mualpho leh hrem hlauh avang chauh nilo in, kan khawtlang leh ram kan hmangaih hrim hrim avangin kan sum hmuh leh hnathawh te chu a in mil tur a ni, a ti.

Er. Lalrinawma, MLA chuan tunlaiah ram mipuiten thil diklo titute hrem an chak ngawih ngawih tawh a, chuvangin thil hi theihtawpa dik leh felfai a kan tih chhoh zel a ngai dawn a ni, a ti a. VC te hnathawh endik tu a awm reng tawh dawn avangin, hna thawh tur reng reng te chu a guidelines zir chiang a, thawk turin a chah a ni.

He inhmuhkhawmna zawhah hian Lunglei khaw chhung – Serkawn, Venglai, Chanmari leh Theiriat ah VC te hna thawh endikna an nei a. Lunglei District huamchhungah naktuk hian Tawipui South leh zirtawpni hian Haulawng ah te endik hna an kalpui leh dawn a ni.