No.1667/2020-2021

Aizawl, the 4th June 2020 : Vawiin khan Health & Family Welfare Minister Dr. R. Lalthangliana, Higher & Technical Education enkawltu ni bawk hovin a Pisa-ah hripui leng avanga College leh University khar mek, hawn leh hun tur leh Exam hrang hrang buatsaih hun tur chungchangte, Chief Secretary Pu Lalnunmawia Chuaungo, Mizoram University hotute, School Education leh Higher & Technical Education senior officials ten an sawiho. Boruak a danglam lohva, sawrkarin rem a tih chuan July ni 13, 2020-ah College te hi tan leh beisei a ni.

Mizoram University Registrar Prof. Lalnundanga leh Controller of Exams Prof. Lalnuntluanga te chuan University-ina Revised Academic Calendar nimina MZU Vice Chancellor hova meeting-in an duan leh rawt te chu chipchhiar takin meeting-ah an sawi a. Meeting chuan Under Graduate leh Professional Course-a Semester hrang hrang Exam dan tur ruahmanna duan te, II and IV Semester zirlaite III leh V Semester-a an kai chhoh dan tur UGC in thurawn a pek te thlir hoin Mizoram pawna awm mek zirlai te lo kir huna exam chungchanga harsatna awm thei te, zirna in tam tak quarantine center a hman mek a nih avanga harsatna awm thei te zau takin an sawiho a. Exam hun tur chungchangah chuan Final year te chu an kal zelna tur a khaihlak loh nan ngaihpawimawh hmasak ni se, an ti.

Meeting chuan MZU ruahmanna chu zau taka an sawiho hnuin tha an ti a. College hawn leh hun tur rawtna chu State Executive Committee, State Disaster Management Authority in an pawmpui turin SEC ah thlen ni se tih an rel a. School Education Commissioner & Secretary Pi Esther Lalruatkimi chuan pawl 12 zirlai te chu college kai chho tur an nih avangin anmahni hmakhaw ngaia college tan hun tur ruat tha a tih thu a sawi. Ruahman dan chuan Ist Semester hi August ni 20 bawr velah tan beisei a ni.

Meeting chuan college tan ni a rawt chu hripui leng boruak thlir chungin he ruahmanna hi thlak theih a nih thu pawh an tarlang a. Under Graduate (VI) (Final) Semester Exam leh Professional Course (LLB, BCA, MCA leh BBA) Even Semester 2020 (II/IV/VI/VIII) te chu July ni 20, 2020 ah leh Professional Course (B.Ed, M.Ed, M.Pharm(IV Sem tel loin), B. Bharm, B. Ed(Spl), B.Sc. (MLT), B. Optom, B.Sc. (RIT), BSW leh B.Sc. (Nursing)) Even Semester (II/IV/VI/VIII) te chu August ni 17, 2020 ah Exam tan nise tiin an ruahman a ni a. Revised calendar ang chuan 1st, 3rd leh 5th odd semester exam hi November ni 23 a neih tan turin duan a ni.

Mizoram pawn atangin hnamdang zirlai RIPANS ah 300 bawr vel leh MZU ah 500 bawr vel an awm a. Heng hovin harsatna an tawh loh nan Exam hun hi ruahman anih thu meeting ah MZU hotute chuan an sawi a ni.

UGC Advisory chuan Intermediate Semester (BA, BSc, BCom tuna II leh IV Semester ni mek)- te tan Exam buatsaih lova, an internal assessment leh Semester hmasaa an result-te a zatve a lain Semester an kai chhoh nan Grading siam a rawt a. Mahse hemi chungchanga thutawp siam turin UGC chuan  University-te hi thuneihna a pe a ni.

Ministry of Human Resource Development-in Central University 40 chuang chu an Revised Academic Calendar thawn tura a tih chu Mizoram University chuan bawhzui nghalin Hmarchhaka Central University hetiang thawn thei awmchhun a ni.