1659/2025-2026

Kolasib: Dated the 30 September, 2025: College of Horticulture,Thenzawl, Central Agricultural University, Imphal, Manipur-a Bachelor of Science (Horticulture) zirlaite chuan August ni 18 atanga September ni 30, 2025 chhung hian Krishi Vigyan Kendra (KVK), Kolasib-ah Rural Entrepreneurship Awareness Development Yojana (READY) programme an hmang a. Vawiin khan KVK Kolasib Conference Hall-ah he programme kharna leh certificate hlanna hun hman a ni.

Student READY programme ah hian College of Horticulture, Thenzawl-a B.Sc (Horticulture) zirlai mi 25 an tel a. Hemi hun chhung hian Group thumah inthenin khaw hrang hrang pathum- Thingdawl, Kawnpui leh Hortoki-ah loneitute  zirchianna kalpui a.  Heng bakah hian subject hrang hrang - Agronomy, Horticulture, Plant Protection, Soil Science, Agricultural Engineering, Fishery Science leh Home Science-ah te KVK mithiamten uluk tak leh ṭha takin zirtirna an pe. 

Pu Rualthantluanga Pachuau Subject Matter Specialist (Fisheries), KVK Kolasib chuan he programme kharna leh certificate hlanna hun kaihruaiin, Senior Scientist and Head leh Student READY Course Director ni bawk Dr. Michelle C. Lallawmkimi chuan zirlaite fuihna leh duhsakna thu a sawi a, certificate a hlan nghal bawk.

He hunah hian College of Horticulture, Thenzawl-a BSc (Horti) Final Year zirlai te chuan an thil zir chhuahte Powerpoint presentation hmangin an entir a. Pu Zohlunpuia, Subject Matter Specialist (Agronomy) KVK Kolasib in lawmthu sawiin hun a khar a ni.