Information & Public Relations Minister Pu Lal Thanzara chuan vawiin khan Chanmari YMA Hall, Aizawl-ah Industries Department hnuaia Aizawl North-III leh Aizawl West-III Cluster a NLUP 3rd Phase beneficiary 359 te hnenah NLUP 2nd Installment a sem.

NLUP beneficiary te hmaah thuchah sawiin Pu Lal Thanzara chuan NLUP chuan Mizoram mipuite ei leh bara kan intodelh a, rethei fal bik awm lova hlim tlang taka kan khawsak ho theihna tur kawng sial hi a tum ber a ni a ti a, September ni 30, 2016 thleng khan Mizorama chhungkaw 1,32,071 hnenah NLUP sem tawh a ni a, kum 2011 chhiarpui a Mizorama chhungkaw awm zat 2,22,079 atanga chhut chuan Mizorama chhungkaw 59.47 % hnenah NLUP tanpuina hi pek ani tawh a, kum khat chhunga Mizoram chhunga mitin sum lakluh chawhrual (per capita income) pawh Economic Survey of Mizoram tarlan danin kum 2008 ah Rs. 38,582/- anih laiin NLUP sem hnu kum 2015 ah chuan Rs. 97,780/- a ni tawh a, hei hi India rampum average Rs. 93,293/- aiin a sang zawk a hetiang dinhmuna Mizoram a vawikhat awmna ani nghe nghe ani a ti bawk.

Khuallian chuan NLUP sem hnu a per capita income a lo san tak ah hian kawng hrang hrangin nghawng a nei a, kohhran thawhlawm leh bank a tangka dahluh pawh a let thum laiin a pung a, Mizorama kohhran lian Presbyterian kohhran thawhlawm pawh kum 2008 ah Rs. 50.42 crore anih laiin kum 2015 ah chuan Rs. 164.58 crore a ni a, Baptist kohhran thawhlawm tling khawm pawh kum 2008 ah Rs. 11.82 crore niin kum 2015 ah chuan Rs. 40.47 crore ani hial a ni a ti a, Mizoram chhunga Bank a sum deposit zat pawh kum 2008 ah Rs. 1924.60 crore niin kum 2014 ah chuan Rs. 5678.99 crore a kai a, hei hi Sawrkar hlawh 6th Pay recommendation anga kalpui anih vang a nilo a ti bawk. Pu Lal Thanzara chuan NLUP sem anih hnu hian tlangram lo neih pawh 29.75% in a tlahniam tawh a, hei hian ramngaw leh nungcha humhalh kawngah nasa takin awmzia a nei ani a ti a, NABCONS/NABARD, Synod Social Front leh Mizoram University a mithiam te pawhin NLUP an lo zirchian tawhna ah a tha thawkhat an ti a, Mizoram University a mithiam ten uluk taka tunhnaia Agriculture & allied sector leh Industry sector an zirchianna ah a dawngtute zinga 44.78% in an thatpui ani tih an hmuchhuak a ni a ti bawk. Sawrkarin NLUP hlawhtlinpuitute chhawmdawl chhunzawmna turin New Economic Development Policy a duang chhuak a, anni bakah NLUP dawngtu, thahnemngai taka hna thawk vanduaina leh harsatna lian tak avanga an beisei ang pha lo te chhawmdawlna tur pawh ruahman tel a ni a ti bawk.

Thu a sawi zawh hian khuallian hian NLUP beneficiary pasarih hnenah tanpuina tangkafai a hlan a, an ni bak midang zawng chu Actual Payee Receipt leh tanpuina sum dik taka hmang tura intiamkamna an ziah hnu ah an bank account ah thun sak vek an ni.

Vawiin a NLUP tanpuina dawngtute hi Aizawl North- III leh Aizawl West-III Constituency a NLUP beneficiary 359 an ni a, Aizawl North-III atangin beneficiary 215 (Petty Trade-I 129, Petty Trade-IV 1, Carpentry 1, Tin Smithy 3, Blacksmithy 2, Special Micro Enterprise 73, Steel Fabrication 5, Broom making 1) Aizawl West-III atangin beneficiary 144 (Petty Trade-I 70, Petty Trade-IV 4, Tin Smithy 1, Blacksmithy 2, Special Micro Enterprise 61, Steel Fabrication 2, Chow Making 2, Broom Making 2) an ni a, tanpuina semchhuah zat hi Rs. 15,143,600/- (Aizawl North- III Rs. 9,208,100/-, Aizawl West-III Rs. 5,935,500/-) a ni.

Commerce & Industries department hnuaiah hian NLUP Trade chi hrang hrang 24 leh Special Micro Enterprise 40, avaiin 64 a awm a, tunah hian Cluster paruk Aizawl West-I, Aizawl West-II, Aizawl South-I, Aizawl South-II, Tawi leh Chalfilh ah NLUP sem chhunzawm tura inpeihfel a ni tawh bawk a ni.

Vawiin NLUP sem inkhawm hi Pu J. Hmingthanmawia, Director, Commerce & Industries Department in a kaihruai a, Pu H. Thangmawia, General Manager, District Industries Centre, Aizawl in technical report a pe a, Pu CT Rosiama, Deputy Director, Jt. Director, Commerce & Industries Department in lawmthu sawiin hnu a khar a ni.