591/2025-2026

Dated Serchhip, the 14^th May, 2025: Vawiin khan Commerce & Industries Director Pi Maria CT Zuali chuan Serchhip a tlawh a. Serchhip DC Pu Paul L.Khuma leh khawtlang hruaitute nen DC Meeting Hall-ah Darnam tlanga din tum Serchhip Industrial Estate chungchang a sawipui.  

Industries Director chuan Serchhip District-ah Industrial Estate chawikanna tur Project thehluh a ni dawn tih sawiin Revenue Department te nen an enho hnuah DIC Complex, Darnam Tlang chu Industrial Area a puan a, a hmun a zim avangin Plug & Play Facility (Flatted Factory) dah ni se, tia an rel thu a sawi a. Darnam Veng mipuiten Office sawn an phal loh avanga harsatna awm chungchang sawifiahin, Office lak sak ni loin a aia changtlung zawk an neihna tur ruahmanna a ni zawk tih khawtlang hruaitute a hrilh a ni.  

Flatted Factory hi building pakhata factory/unit tam tak awm theihna tur a ni a. Serchhip District pawh hian Flatted Factory a neih ve ngei theih nan hma lak mek a ni a, Rs.14,99,00,000 man hu project siam mek a ni, Pi Maria CT Zuali chuan a ti.  

Serchhipa Flatted Factory Complex hi square meter 2000 bial chhunga sak tum a ni a. Thil siamchhuahna hmun tur a nih angin kawtkai zau tawk tak awm tur a duan a ni. Unit hrang hrang 24 tan hmun awl awm tura ruahman a ni a. Unit 1 in mi 3 zel chhawr thei tur anga chhutin heng industrial unit-ah te hian mi 72 in eizawnna an nei thei tura beisei a ni. Heng industrial unit te hian a vaiin kum 1-ah sum che vel cheng vaibelchhe thum (3) bawr vel nei tura ngaih a ni bawk. 

Vawiin meeting-ah hian Sub Headquaters YMA hotute, Joint VC hotute, Darnam VC te leh official te an tel a. Darnam khawtlang hruaitute hian an area chhunga Industrial Estate awm tur chungchang hi a thuphungin an pawm a. Darnam Venga cheng mipuiten a nih phung tur an hriatthiam theih nan DCIO Pi Lalchhanhimi chuan naktuk May ni 15, zingkarah mipui ko khawmin inhrilhfiahna hun an hmang dawn a ni.