No.4182/2021-2022
Aizawl, the 5th March 2022 : Vawiin khan Commerce & Industries Minister Dr. R. Lalthangliana chuan Ex-MNA Multipurpose Cooperative Society Limited in Saiphal zau, Mamit District a Bamboo Plantation ah mau - rawmi leh brandisii an chin te chu a hmunah kalin an hmalakna te a enpui a. Minister hi SEDP hnuaia Bamboo Development Board Vice Chairman Dr. K. Pachhunga in a tawiawm a ni.
Dr. R. Lalthangliana chuan mau chungchanga Chief Minister hmathlirna chu ram hmasawnna atan a pawimawh dante sawiin Ex-MNA memberte chu Bamboo Plantation a hlawhtlin ngei nan theihtawp chhuaha tan la turin a chah a. Tuna Sawrkar chuan sawrkar hmasa te thil tih, tha nia a hriat te chu an chhunzawm thusawiin chutiang bawkin tu pawh lo Sawrkar ta sela, in hmalakna te hi chhunzawm tlak ni thei tura tan la turin ka duh che u a ni, a ti. Mau chin bultanna an buaipui mek, hlawhtlin nan kum 5 vel tal a ngaih a rin thu sawiin hmasawnna langsar turin kum 5 vel a ngai dawn a, in tawpsan mai ang tih ka hlau a, a hlawhtlin ngei nan in ngaihtuahna zawng zawng seng turin ka duh che u a ni, a ti.
Helai hmunah mau tharchhuah dan a zirin mau sawngbawlna semi processed anga a buaipui theihna tur hmarua leh khawl bun Ex-MNA te an rawt chu Minister chuan tha tiin agarbatti stick leh Mau hmanga thil dang siam theih te hi a market a lian a chuvangin lian tham taka hma kan lak theih tur kan rilrua kan dah len a ngai tiin a sawi a. He hmuna Changel atanga lazai siamchhuah theih dan kawng dap chu tha tiin hei hi Bamboo Development Agency lamin lo zir chhin se a ti a. Minister chuan helai zau a hnathawk te tan handsantiser, thosi hlo leh thosilen a hlan bawk a ni.
Dr. K. Pachhunga, Vice Chairman, Bamboo Development Board chuan helai hmuna mau chin dan tlangpui leh Bamboo Development Board in a puih dan te chu Minister a hrilh a. Ex-MNA hruaitute pawhin bul an tan dan te, hma an lak dan te leh hma thlir an neihte an sawi.
Ex-MNA Bamboo Plantation hi SEDP hnuaia mau chungchanga hmalaknaa Pilot Project a ni a. Saiphal zau hi West Serzawl bul atanga peng thla in Aizawl atangin kilometres 78 vel hla a ni a. Ex-MNA Multipurpose Cooperative Society ah hian member 115 awmin chungte chu beneficiary an ni vek a. A ram hi tin 600 hmun vela zau niin ram hectare 180 a zau ah rawmi leh brandisii tiak 66,500 an phun a ni.
Horticulture Department, Commerce & Industries Department leh Bamboo Development Agency officer leh hnathawk dangten Minister hi an tawiawm bawk a ni.
Attachment
- Loading attachment...
