Commerce & Industries Minister Dr. R. Lalthangliana’n vawiin khan December ni 7 thlenga awh tur, Mizoram Handloom and Handicrafts Development Corporation Limited (ZOHANDCO) buatsaih Aizawl Special Handloom Expo 2019 chu Zarkawt Recreation Centre ah a hawng a. Handloom Expo hawnna ah hian ZIDCO Chairman Pu Lalthlengliana, KVI Board Chairman Pu Lalthanliana, AMC Deputy Mayor Pu Lalringliana te bakah AMC Councillors thenkhate, Pu J. Hmingthanmawia, Director, Commerce & Industries Department leh ZOHANDCO Board Member te an tel a ni.

Dr. R. Lalthangliana chuan Mizo puantah leh Mizo incheina handloom tih maia eizawng mek te chu Zofate hnam ziarang phochhuaktu, Mizo nihna a taka lantirtute an nih avangin  an eizawnna kawng chu hna thawh zahawm leh ropui leh danglam tak a nih thu a sawi a. Mizo thalai tam takin tunlaia Mizo ziarang  leh Mizo khawsak zia thil te an hmu pha tawh lova, thlangra awmzia hre lo te pawh an awm hial tawh a, chuvangin mahni thil te hlut nachang hriat kan inzirtir leh hriat zel a ngai a ni, a ti.

Commerce & Industries Minister chuan Sawrkarin Mizo incheina leh inthuamna te mipuiin an ngaihsan zel atan leh handloom sector chawikan nan Niliani apianga Sawrkar hnathawkte Zothuam hak ni ah a puang chungin, a ha an la tlem tih sawiin kan hnam rohlu te hi kan zahpui tur ani lova, hemi kawnga hian tan la thar turin sawrkar hnathawkte leh mipui te ka ngen nawn duh che u a ni, a ti a. Handloom pawimawhna a sawi zel naah Minister chuan Mizoram pawna Trade Fair telnaah inbuatsaihna kawnga thil siam phochhuah tur te thlan uluk a tul thu sawiin henga kan inbuatsaih lawkna te pawh hun tam zawk pek a ngai a, kan thil siam quality hi quality tha,  export quality a kan siam a pawimawh hle a ni, a ti bawk.

Handloom Expo hawnna inkhawm hi ZOHANCO Managing Director Pu Lalramsanga Sailo in kaihruaiin ZOHANDCO Chairman Pu C. Lalrammawia chuan Sawrkarin tunhnaia ZOHANDCO a tun din chhoh leh danah lawmthu a sawi a ni.

Aizawl Special Handloom Expo hi Development Commissioner for Handloom, Ministry of Textiles in an sponsored a, nakum lamah Saitual leh Hnahthial lamah pawh Expo neih tum a ni a, tun tum Expo ah hian stall 30 vel in an puan tah leh thil siam te an pho chhuak a ni.