No.6510/2020-2021
Aizawl, 11th November, 2020 : Vawiin khan Commerce & Industries Minister Dr.R.Lalthangliana hovin SAD Conference Hall, MINECO-ah Myanmar leh Bangladesh ramria insumdawntawnna (border trade) tihhmasawn dan tur leh hmalakna kal mekte chungchang sawiho a ni a. He meeting-ah hian Pu C.Ramhluna, Vice-Chairman, Industrial Development Board bakah Commerce & Industries, PWD leh Revenue Department officials te an tel.
Vawiin meeting kaihruaitu Commerce & Industries Minister Dr.R.Lalthangliana chuan ram a thang zel a, ram leh ram insumdawntawnna (International Trade/Border Trade) chu sorkar laipuiin a ngai pawimawh chho zel a, Mizoram pawhin theihtawpin tan a la ve zel a ni a ti a. Tunah hian Mizoramin ramria sumdawnna hmun (trade centre) atana a hman thenkhatte hi tun hma atang tawhin sumdawnna a kal rengna hmun a ni a, ram leh ram inhriatpuinaa sumdawnna a kal theih chuan awlsam leh tha zawkin sumdawnna kalpui thei ang a, ram pawhin hma a sawn thei dawn a ni a ti bawk.
Mizoramin ramria sumdawnna a kalpui mek leh nasa lehzuala kalpui a tumna hmun, heng - Land Custom Station, Zokhawthar, Integrated Check Post, Kawrpuichhuah, Land Custom Station, Zorinpui leh Trade Centre (LCS/ILP), Saisihchhuah ah sorkar laipui tanpuinain chak taka hmalak zel a ni a. Myanmar leh India sorkar ten MoU an sign angin Border Haat hmanga sumdawna atan sorkarin heng - Hnahlan, Zote, Vaphai (Saikhumphai) leh Pangkhua-ah te Haat sakna turin ram a nei tawh a, land lease pawh tihfel mek a ni, Border Haat sakna tur hian sorkar laipui ruahmanna angin Haat pakhatah cheng nuai 50 ruahman a ni a, sum dilna pawh thehluh tawh a ni. Myanmar ram nena inkalpawhna tur Lei (bridge) dawhna hmun tur pawh Myanmar official-te nen enfiah ni tawhin Central-ah thehluh a ni tawh bawk.
Bangladesh nena Border Haat hmanga insumdawn tawn theih nan Mizoram chuan hmun a nei tha a, Marpara, Silsury, Tuipuibari leh Nunsury ah te hian Haat siamna tur sorkar laipuia Ministry of Commerce hnenah thlen a ni tawh bawk.
Heng Border Trade leh Border Haat hmunte hi hun remchang hmasa berah Joint Inspection neih a that a rin thu Minister Dr.Lalthangliana chuan sawiin kumin chu Covid-19 avangin sorkarin Commerce & Industries hnuaiah duh anga chakin hma a la thei lo chu pawi a tih thu a sawi a. International Border hrulah insumdawnna tur hmun remchang dangte pawh dap thiam a, sumdawnna atana pawimawh em em kawngpui siamthat te, warehouse, weigh bridge, security, quarantine house leh rest house te pawh siamthat leh thawmthat zel a pawimawh ang a ti.
Mizoram hian international boundary-ah 722 kms - khawchhak leh chhim lamah Myanmar nen 404 kms leh khawthlang Bangladesh nen 308 kms-a thui a nei a ni.
