Vawiin chawhnu khan Commerce & Industries Minister Pu H.Rohluna chuan Food Testing Laboratory, Central Medical Store Zemabawka sak mek chu a hmunah Commerce & Industries department hotute nen an tlawh a, hawn theih a peihfel anih theih nana hmalak zel dan turte an sawi ho.

Minister Pu H.Rohluna chuan Mizoramah awlsam leh rang zawka ei leh intur te a him leh himloh enchhin zung zung thei tura Food Testing Laboratory a awm tur hi a lawmawm hle a ni, a ti a, ram pawn atanga thei, thlai leh eitur chi hrang hrang kan lakluhte hi Chemical, hriselna atan a hlauhawm lakah a fihlim em tih kan hriat a pawimawh a ni, a ti. Pu H.Rohluna chuan Food Testing Laboratory hi mipuiten ei leh in thianghlim leh hrisel zawk kan neih theih nan tangkai taka hman anih ngei a beisei thu a sawi a, Commerce & Industries leh Health & Family Welfare department te thawh hona fakawm a tih thu a sawi bawk.

He hunah hian Pu J Hmingthanmawia, Director Commerce & Industries, Pu HD Lalrintluanga, Jt Director, Pu Lalsawma Pachuau Jt Director, Dr Lalduhawma leh Food Analyst ten khawl hrang hrang enchhinnate an nei a, sangha sample ah Formalin a awm leh awmloh an test nghal bawk.

Food Testing Laboratory dinna tur hian Ministry of Commerce & Industry, Government of India Export Development Fund-NER hnuai atangin a sakna tur sum hi hmuh a ni a, mipuite chhawr theih turin rang taka hawn thuai a nih theih nan hmalakna a kal mek a ni. Food testing laboratory ah hian Ultra High Pressure Liquid Chromatography, Atomic Absorption Spectrometer, Ion Chromatography, UV Visible Spectrophotometer, Microbiology Laboratory bakah eitur leh tui test na khawl hrang hrang a awm bawk a ni.