1778/2025-2026

Dated Aizawl, the 8^th October, 2025 : Nimin khan Pu F. Rodingliana, Minister, Commerce & Industries Department chuan Commerce & Industries Department buatsaih ‘The Industrial and Investment Policy of Mizoram, 2025’ leh ‘The Mizoram Procurement Preference Policy for MSEs, 2025’ te chu Vanapa Hall-ah a tlangzarh a. Dr. K.C. Lalmalsawmzauva, Adviser to CM (Implementation of Hand-holding Policy) & Vice Chairman, Mizoram State Policy Coordination Committee ni bawk chu Khual zahawm a ni a, Dr. H. Lianzela, Director, Commerce & Industries Department, chuan hun a kaihruai a ni.

Minister Pu F. Rodiangliana chuan Mizorama industry dinna leh tihchangtlun zawkna tura policy tha tak duan a ni leh a vawikhatna atan Investment policy siam a ni chu lawmawm a tih thu a sawi a. Kan ram dinchhuah nan industry a pawimawh thu sawiin kan rama thil siam leh thar chhuah ngei mipuiten kan ngaihhlut a ngaih thu a sawi a. Tunlai khawvel thangmeka industry dinna tura power mamawhna sang zel leh a tul anga hmun zau zawkte siam a nih theih nan Policy thar hi duan a ni a ti a. Khawvel hmun danga industrialists-ten ngaihsan leh ngaihhlut an hlawh anga kan mizo industrialist-te pawhin hmasawnna duhawm tak an neih theihna tur te, thangthar lo awm lehzel turte tan pawha eizawnna ngialnghet siamtu leh kawng sialtu pawimawh tak a ni dawn a ni a ti. He policy ti hlawhtling tur hian department hrang hrangte thawhhona, inpekna leh inlawmtawnna a pawimawh thu a sawi bawk a ni.

Khuallian Dr. K.C. Lalmalsawmzauva chuan Mizoram sawrkar thil tum chu agriculture-based economy atanga Industrial state a inhlankai a nih thu sawiin, industry nei tur chuan thlai chin (agriculture) atanga bul tan a ngaih thu a sawi a. Kan ramah leilung hausakna, thlai leh mau tih vel loh chu industry dinna khawp thar chhuah kan neih loh avangin sawrkar chuan thlai thlan bik - Sawhthing, Aieng, Hmarcha leh Hmunphiahahte support price a pe a, chu chuan nasa takin kuthnathawktute tharchhuah a tihpun thu a sawi.

Hun kaihruaitu Dr. H. Lianzela chuan policy chungchang sawi hawnna neiin, Pi Garima Gupta, Commissioner & Secretary, Commerce & Industries Department chuan kal khawmte hnena Investment Policy hma thlir leh thil tumte sawina hun a nei bawk a ni.

Pu Lalhmunsiama, Addl. Director, Commerce & Industries Department chuan ‘The Industrial and Investment Policy of Mizoram, 2025’ chungchang sawifiahna leh inhrilhhriatna kimchang presentation hmangin a nei a. Pu P.C. Lalvuana, Joint Director (MSME), Commerce & Industries Department chuan ‘The Mizoram Procurement Preference Policy for MSEs, 2025’ chungchang inhrilhfiahna a nei bawk.

He ‘The Mizoram Industrial & Investment Policy,2025’  thil tumte chu-

• Ease of doing business hmanga awlsam taka document tih fel zung zung te,
• Entrepreneurship tih hmasawn te,
• Special investment zone a taka kalpui tur te,
• Made in Mizoram uar taka kalpui tur 

A HNUAIA TARLAN THIL SIAMCHHUAHTE LEH SERVICE-TE HIAN HE POLICY HI AN HMANG THEI ANG: 

I. MANUFACTURING ITEMS

II. SERVICE ITEMS

III. HE POLICY HNUAIA HAMTHATNA HMU THEI TURTE