1129/2025-2026

Aizawl dated 10th July 2025: Vawiin khan Commerce & Industries Department Minister Pu F Rodingliana chuan Export Promotion Industrial Park(EPIP) Lengte a tlawh a. Industrial unit hrang hrangte awmze nei zawka bun a nih theih nan ruahmanna siamte a enpui a ni. 

EPIP Lengte re-plotting hna hi Commerce & Industries Department leh Chief Architech, Mizoram PWD ten buaipuiin, Industry thuhmunte chu hlawm khata dahkhawm tur a ruahman an ni a. EPIP chhunga inkalpawhna mumal tak a awm theih nana a ruahmanna leh felfai tak a power supply line zam dan turte enho a ni. EPIP, Lengte chhunga Industry-a hman tur powerline hranpa siam dan turte Power & Electricity Minister ni bawk Pu F Rodingliana ho hian en nghal niin, Power supply mumal leh tha neih a nih theih nan Sihhmui Sub-Station atanga 11 kV line hmanga EPIP Lengte chawm dan turte sawi ho a ni a. Tun dinhmunah domestic consumer line dangte nen inthlun pawlh rih a nih avangin line dang siamthat apiangin kawlphetha inpekna a chatlak phah thin thu sawi a ni. 

Industries Minister Pu F Rodingliana chuan Industry inangte hmun khata a hlawma dahkhawm a nih chuan Industry atanga bawlhhlawh chhuak (waste product) te pawh awmze nei a sawngbawl leh hman tangkai theih a nih beisei thu a sawi a. EPIP, Lengte chhunga hmasawnna hnathawh mekte bakah Industrial unit te tui mamawh ang mumal zawka pek dan turte a enpui nghal a, Industrial Estate Luangmual a hmasawnna hnathawh mekte a en nghal bawk.

Industries Minister hi Dr. Lalzirmawia Chhangte, Commissioner/Secretary, Pi Maria CT Zuali, Director, Pi Lalchhandami, Chief Architect, MPWD, Pi Zothansangi Pachuau, Govt. Advocate leh Er. H Lallianmawia, EE, P&E ten an tawiawm a ni.