2055/2022-2023
Champhai, the 23rd September, 2022: Vawiin khan Pu H.Lalengmawia IAS, Commissioner & Secretary, Home & P&E Department chuan Champhai leh Zokhawthar a tlawh. Champhaiah District Official-te meeting a neihpui hnuah Zokhawthar a tlawh a, Myanmar ram buai avanga raltlante harsatna tawh hrang hrang a hmunah tlawhin a enfiah.

Pu H.Lalengmawia IAS, Commissioner & Secretary, Home & P&E Department changtu chuan vawiin chawhma dar 10:00 khan 8th Assam Rifles Complex, Darthlalangtlang, Champhaiah District Official-te meeting a neihpui a. Meeting-ah hian a enkawl Department hnuaia District tana thil pawimawh tak takte thlirho a ni.

He hunah hian Champhai District chhunga Myanmar atanga raltlante dinhmun leh buaipui dan chungchangte, tunlaia ruihhlo tawlhruk man a ni ta fo chungchangte, silai leh a mu leh puakthei dang District chhhunga buaipui dan chungchangte, Narcotics Control Bureau inbunna tur hmunhmate, Narco Co-ordination Centre hmalaknate leh Champhai khawpuiin power supply hnianghnar zawka a dawn theih dan tur chungchangte sawiho a ni.

Pu H.Lalengmawia, IAS, Commissioner & Secretary chuan Champhai District enkawlna kawnga sawrkar hnathawk hrang hrangte leh NGO aiawhte thawhhona tha tak awm chu fakawm a tih thu a sawi a. District chhungah boruak tha leh muanawm a awmzel theihna tura theihtawp chhuah zel turin District mipuite a ngen a ni.

Champhaia hun a hman zawh hnu hian Pu H.Lalengmawia chuan Myanmar ram buai avanga Zokhawthara raltlante dinhmun a enfiah a. Power supply-a harsatna an tawh mekte chinfel a nih theihna tura hmalak dan tur a hmunah a en a. Lipui chhuah leh Tiau lui kama raltlante awmna hmun hrang hranga power supply pek dan tur chungchangah a tul anga hma la turin Department hnathawktute a hriattir a ni.

Home Commissioner hi raltlan hruaituten lo hmuin an harsatna hrang hrangte an sawipui a, an harsatna thlente chu a tul anga hmalak a nih theih nan Sawrkara a thlen tur thu raltlan hruaitute chu a hrilh a ni. Tun dinhmunah hian Zokhawtharah raltlan chhungkua 1000 chuang an awm meka chhinchhiah a ni.

Zokhawthar a tlawhnaah hian Commissioner & Secretary, Home & P&E Department Pu H.Lalengmawia IAS hi Power & Electricity Department Champhaia thawktuten an tawiawm a ni.