Assembly Committee peng pakhat Committee On Local Fund Account Team te chuan nimin leh vawiin khan Mamit District chhunga 13th Fianance Commission hnuaia Village council kaltlanga hmasawnna hna thawh hrang hrangte a hmunah an tlawh.

He COLFA Team te hian nimin khan Bairabi, Zamuang, Zawlnuam te an tlawh a, tukin zing khan Mamit khawpui chhunga village council hrang hrang Hmarveng, Venghlun, Bazar Veng, Field Veng, huamchhunga V.C kaltlanga hnathawh hmun 7 (pasarih) an tlawh a, W.Phaileng leh Reiek BDO hnuaia Village council hrang hrang hnathawhte a hmunah an tlawh leh nghal ang.

Committee on Local Fund Account ah hian Member 7 an awm a, Pu John Siamkunga Chairman niin Members te chu Pu T. Vanlalvena, Aizawl S-I, Pi Vanlalawmpuii Chawngthu, Hrangturzo, Pu Lalthanliana, Aizawl N-II, Er Lalrinawma Tuikum, Pu Vanlalzawma Aizawl W-III leh Pu T. Sangkunga E- Tuipui te an ni. an ni hian CAG Audit report behchhanin hna an thawk thin a, hmasawnna hna thawh chhuizui ngai leh vil zui ngai awm te an vil zui thin a ni, hmasawnna hna khairual lo leh duhthusam lo ah Committee hian thutawp a siam thei a ni.

Heng khaw hrang hranga an tlawh kualna ah hian COLFA Team te hian Village council hrang hrangte chu ram leh hnam hmasawnna tura hnathawk thin turin leh 13th Finance Commission in thawk tura ruahmanna an siam te zawm a, tha taka thawk thin turin an chah.

Mamit District chhung khaw hrang hrang a Village council kaltlanga hmasawnna hna thawh tlawha fehchhuahna ah hian Committee On Local Fund Accounts Member 7 atangin Pu John Siamkunga, Chairman, R. Vanlalvena, Pi Vanlalawmpuii Chawngthu, Pu Lalthanliana leh Er Lalrinawma te bakah Mizoram Assembly Secretariat Officials ten an tawiawm a ni.