Union Ministry of Housing and Urban Poverty Alleviation & Culture (HUPA) leh Mizoram sorkar huaihawt, Conclave on Urban Poverty Alleviation for North Eastern States and Sikkim chu vawiin khan Mizoram Legislative Assembly Conference Hall-ah neih a ni a, Union Minister for HUPA Pi Kumari Selja leh Mizoram Chief Minister Pu Lal Thanhawla ten an hmanpui.

Chief Minister Pu Lal Thanhawla chuan he conclave nei thei tura Union Minister Pi Kumari Selja hmalakna ah lawmthu sawiin, conclave hmang tura tel zawng zawngte chu lawmna chibai bukin thenawm state Minister te an rawn tel theilo chu pawi a tih thu a sawi hmasa a. Pu Lal Thanhawla chuan hetiang hun pawimawh tak Mizoramin kan thleng chu ni chhinchhiah tlak a ni a ti a. Central sorkarin khawpui a enkawl dan leh mirethei chengte chhawmdawl nana a hmalaknate min hmuh chian tir tu leh sorkar laipui pawhin hmarchhak bial an rawn hriatchianna anih ngei a beisei thu a sawi a.UPA sorkarin khawpui tih changtlun nana Jawaharlal Nehru National Urban Renewal Mission (JNNURM) a kalpui leh khawpuia cheng miretheite khaichhuahna tur Rajiv Awas Yojana (RAY) policy huapzo tak a rawn chhawpchhuak chu a vanneihthlak hle a ni a ti.

Chief Minister chuan India ram hmundang ang bawkin Mizoram chu hmasawnnaah a thang hle a, khawpui leh thingtlang than dan pawh state dang tam tak anglo takin a rualkhai hle a ni a ti a. Kum 2011 Census a a lan danin khawpui leh thingtlanga cheng mihring te pawh a inzat hle a ni a ti. Khawpuia miretheite eizawnna tur buatsaih sak kawngah hmasawnna ruhrel siam sak hi thil tul hmasa ber te zinga mi a ni tiin, zirna in te, chenna tur te, eizawnna hna siam sak leh ei tur pek te hi kan thil tih tur pawimawh takte an ni a ti a. RAY in a a tum ber, miretheite chenna, slum, tih hi keini ang tlangram state ah chuan a awmlo a tih theih a ni tiin, Pu Hawla chuan kan khawtlang nunah mi rethei leh hausa daidanna awm lova khawsa ho dial dial kan nihna hi state dang te laka kan danglamna a ni a ti a. Kan in sakna hmunte hi tlang pang a awm, pucca building nilo te an nih hlawm avangin a in neituin luah hawh tura a phalte chu a tha tawklo thin hle a ni a ti a. Chuvangin kan mamawh chu man to lova in sak, mamawh zual dah te a ni a ti. Hemi anih avangin RAY hi kan tlangram awm dan mila kalpui hi kan thatpui zawk a beisei awm a ni a ti.

Pu Lal Thanhawla chuan RAY thil tum hi chona lian tak a ni a, a hlawhtlin ngei theihna turin hmalak a ni ang tiin, thenawm state te pawhin tan la turin a sawm nghal bawk a ni.

Pu Zodintluanga, Minister for Urban Development & Poverty Alleviation pawhin thusawiin, hmarchhak bial huap hetiang conclave lian tham tak Mizorama nghah a ni chu lawmawm a tih thu a sawi a. UPA sorkarin duhsakna min rawn pek thin avang leh hmathlir tha tak nei Pi Kumari Selja in conclave min rawn hmanpui avangin lawmthu a sawi bawk a. Mizoram sorkarin central sorkara mamawh hrang hrang a thlente chu sanction pe ngei turin a chah nghal bawk a ni.

Union Minister Pi Kumari Selja chuan thingtlang leh khawpui retheihna a inan loh thu sawiin, khawpui a cheng miretheite chu an eizawn nana thiamna siam sak (skill development) a pawimawh hmasak thu a sawi a. Khawpui a miretheite khaichhuahna tura Rajiv Awas Yojana chu hman ber tur ani tiin conclave chu hmarchhak bial tana hlawhtling ngei turin a duhsakna a hlan a ni.

Conclave hmang tur hian thenawm state atangin official engemawzat an lokal a, chawhma lam khan Pu Arun Kumar Misra, Secretary, MoHUPA, Govt of India hovin meeting neih a ni a ; chawhnu lamah sawihona leh presentation neih a ni bawk.