No.3105/2020-2020

Consultative Committee on Health & Family Welfare department chuan an Chairman Dr. R. Lalthangliana, Minister, Health & Family Welfare department hovin vawiin khan Aizawl khawpui chhunga Government Quarantine Facility thenkhat an tlawh a. Vawiina Consultative Committee member kalte hi Dy. Govt. Chief Whip Pu Lalrintluanga Sailo leh Pu Andrew H. Thangliana, MLA te an ni a, Health & Family Welfare Board Vice-Chairman Dr. ZR Thiamsanga pawhin a telpui a ni.

Consultative Committee on Health & Family Welfare department chuan SIRD Hostel, Durtlang Leitan tlawh hmasa berin Quarantine facility viltute nen an inkawm a, SIRD Hostel hi mi 44 awm theihna niin tunah hian naupang 3 telin mi 29 quarantine mek an ni a, an zinga 14 te hi swab sample RT-PCR test negative tawh an ni a, harsatna dang an neihloh chuan chhuahtir thuai tawh tur an ni a, midang 15 hi swab sample la lak loh an ni. Tun dinhmunah hriselna kawngah harsatna tawk an awm rihlo a ni.

SIRD Hostel an tlawh zawh hian Falkland-a Rajiv Awas Yojana (RAY) buildinga BSF sipai quarantine mek te an tlawh leh a, hetah hian India ram hjmun hrang hrang atanga lo haw BSF sipai 100 quarantine mek niin nizan khan an zinga 5 chu COVID-19 positive an ni tih hmuhchhuah a ni a, vawiin chawhma khan ZMC ah admit fel an ni. Helai hmun viltu Dr. Khole Key chuan Consultative Committee te lo dawngsawngin RAY building Block B, C, D leh E ah BSF sipai lo haw te hi quarantine an nih thu a sawi a, July ni 2, 2020 atang khan he quarantine centre hi an luah tan thu leh ni 21 chhung an quarantine dawn thu a sawi a, sipai ho swab sample hi vawihnih test a nih tawh thu a sawi bawk.

Consultative Committee chuan BSF te chu sawrkarin quarantine dan tur a ruahmante khauh taka zawm turin an hrilh a, a bik takin an chhehvela awm khawtlang mipuite leh Local Task Force te nen harsatna an neih loh nan fimkhur hle turin an hrilh a ni.

RAY building an tlawh zawh hian Mualpuia R. Dengthuama Hall an tlawh leh a, tunah hian R. Dengthuama Hall hi Transit Centre atan hman ni tawhin state pawn atanga lo haw te he hmunah hian screening tihsak thin a ni. R. Dengthuama Hall Annexe building hi quarantine facility atan hman chhunzawm a la ni thung a, mi 6 quarantine lai mek an awm a ni.

A hnuhnung ber atan Mission Vengthlanga SAI Hostel tlawh lehin hetah hian mi 74 (mipa 39, hmeichhia 35) quarantine mek an ni a, an zingah hian naupang 23 an awm a ni.

Consultative Committee chuan Quarantine chungchang hi fimkhur leh khauh lehzuala kalpui tul an tih thu sawiin, Mizoram pawn atanga lo haw te chu a theih chin chinah Aizawla quarantine thin nise tha an tih thu an sawi a, R. Dengthuama Hall an chhuahsan hnu a Aizawl pawna haw tur an nih chuan an hawna tur District leh khua bakah an paltlang tur District thuneitute nen tangho a lo vil chhunzawm tev pawh tula an hriatthu sawiin, R. Dengthuama Hall atanga hawn turte pawh sawrkarin an zawm tur dan a siamte chu anmahni mai bakah midangte tana himna tur a nih tel avangin uluk tak leh fimkhur taka zawm ngei ngei turin an duh tih an sawi a. Vairengte screening point an thlen atangin Mizoram sawrkar dan siam khauh taka an zawm a ngai tih sawiin, mimal lirtheia lo haw te pawh an chawlhna leh ei leh in thlengin khua leh tui tha an nihna angin fimkhura, dan zawm tha turin an chah a ni.

Heng quarantine centre hrang hrang te hi medical team in an vil reng a, Quarantine Facility a khung hrante hi khunghran an nih atanga ni 5 – 10 inkarah swab sample laksak thin an ni a, Quarantine hun ni 14 an hman zawh hnu ah an sample test negative a nih a insawiselna an neihloh chuan in lamah strict taka self monitoring ti turin an chhuahtir thin a ni. Heng quarantine centre te hi COVID-19 Committee on Psychological & Social Guidance member ten uluk taka vil rengin naupang quarantine mekte inawmtleina tur te bakah rilru lama harsatna neite a tul ang angin counselling an pe thin a ni. Quarantine centre a awmte hian ei leh in lamah sawisel an neilo bawk a ni.

Consultative Committee chuan Quarantine Facility hrang hrangte enkawl danah lungawithlak an tih thu an sawi a, Mizo mipuiten sawrkar thupek an zawm that vangin state dang nen khaikhinin COVID-19 vei pawh kan tlem hle a ni, an ti a. Mizorama COVID-19 vei mek 79 zinga 64 (81%) chu hnamdang sipai, para-military force te an ni tih sawiin an ni pawh fimkhur lehzual turin an chah nghal a. COVID-19 Committee on Psychological & Social Guidance te hmalakna fakawm an tih thu sawiin COVID-19 chungchang bakah lirnghing vanga thlabarte hnem tura an fehchhuakte chu thil ropui tak a ni, an ti a. Quarantine Centre enkawl kawnga mawh la tu hrang hrang Aizawl DC leh a thawhpuite, Medical team-te, Police, DM&R, AMC, Local task Force te chungah lawmhtu an sawi a. An hmunhma te quarantine facility atana phal tak leh inhawng taka hmantirtu kohhran hrang hrangte chungah lawmthu an sawi bawk.

Consultative Committee Chairman, Health Minister ni bawk Dr. R. Lalthangliana chuan May ni 13, 2020 khan Home Minister Pu Lalchamliana nen Aizawl khawpui chhunga Quarantine Facility pali – Youth Hostel, Luangmual, Tourist Lodge, Chaltlang, NIELIT, Zuangtui leh R. Dengthuama Hall, Mualpui te an lo tlawh tawh thu sawiin, June ni 13, 2020 khan Aizawl vengchhung hmun hrang hranga Government leh Community Quarantine Centre te a tlawh bawk a, June ni 15, 2020 khan kohhran hrang hrang enkawl Quarantine te a tlawh bawk tih a sawi a. Ram mipuite leh kohhran hrang hrang leh khawtlang hruaituten sawrkar hmalakna an thlawp that avanga lawmthu sawiin, inthlahdah hauh lova kan tan tlan reng a ngai a ni, a ti.