Vawiin ni chawhma khan Commerce & Industries Department Conference Hall-ah Model Agricultural Produce and Livestock Marketing (Promotion & Facilitation) Act, 2017 chungchangah Consultative Meeting neih a ni a. Meeting hi Pu J.Hmingthanmawia, Director, Commerce & Industries in a kaihruai a.

Meeting koh a nih chhan sawifiahin, Pu J.Hmingthanmawia chuan kuthnathawktute tana hlawk zawka thlai thar hralhna kawng atan kaihhruaina dan siam tum dante a sawifiah a, he dan thar siam tum hi Sorkar laipuiin State tinte tana hman theih tura Model Act a siam zuizuiin, Mizorama hman ve dan tur ngaihtuahho a tul thu a sawi a .

He Meeting ah hian Line Department hrang hrangte bakah, NGO’s leh Political Party hrang hrangte kalkhawmin Model Act hi zirho a ni a. He Consultative Meeting hian he Meeting a members ten an ngaihmawh lai an tarlan te chu Drafting Committee in rang takin lo ennawn leh nise tiin thutlukna an siam a ni. Drafting Committee neih leh hunah Special Invitee atan AMFU aiawh Pu Zion Lalremruata, PRISM aiawh Pu Vanlalruata leh MSU aiawh Pu R. Lalrempuia te tel ve turin thu tihtluk a ni bawk.

He Model APLM Act, 2017 in a tum ber chu Lo neituten zalen taka an thlai tharchhuahte an duhna hmun apianga hlawk zawka an hralh theihna tur kawng zawnsak bakah, Lo neitute leh a leitute inkara hlawkna tel tumte tihbo a, kuthnathawktute hnena a hlawkna tam ber dahsak hi a tum langsar tak a ni.