937/2024-2025

Aizawl dated 25th June, 2024: Vawiin khan I&PR Auditorium, Treasury Square-ah Mizoram Apex Handloom & Handicraft Cooperative Society Ltd. (MAHCO) te chuan ‘45th Annual General Assembly 2024’ an hmang a. Pu PC Vanlalruata, Minister, Cooperation Department chu Khuallian niin Pu R. Lalremsanga, Registrar of Cooperation Societies chu khual zahawm a ni a, Pu Lalrinkima, Chairman, MAHCO Ltd. chuan hun a kaihruai a ni.

Cooperation Department Minister Pu PC Vanlalruata chuan Handloom chu Mizoram chhung a Industry kan neih te zing a pawimawh tak leh thawh hlawk ber pawl a nih thu sawiin  hmasawnna chak zawk a kalpui a nih theih nan Handloom leh a kaihhnawih Society tam thei ang ber chu MAHCO hnuaia ziah luh zel a pawimawh thu a sawi. Mahni ram siam chhuah ngaihsan leh ngaihhlut a pawimawh thu Cooperation Minister chuan sawiin Sawrkar pisa hrang hrangah pawh mizo kutchhuak bungrua leh hnam ziarang phochhuak thei, Mizo handloom hmang uar zel tur a hmalak a nih thu a sawi a.

Pu PC Vanlalruata chuan Mizoram handloom leh handicraft-in hma a sawn zel theih nan kan kut chhuakte chu khawvel hmun hrang hranga thawnchhuah tlak khawp a tha siamchhuah a tul thu sawiin hemi tur hian pawl anga inkaihhruaina tha tak neih a pawimawh thu a sawi a. Sawrkarin ‘Hand Holding Policy’ kalpui a tum angin MAHCO member-te chu midangte khaichhuak leh kaihruaitu nih tum theuh turin kalkhawmte a chah bawk a ni.

Pu R.Lalremsanga, Registrar of Cooperative Societies chuan Handloom leh Handicraft chu eizawnna rintlak a nih mai piahlamah hnam dangte laka kan hnam ziarang phochhuahna hmanraw tangkai taka hman a nih theih thu a sawi. 

MAHCO 45th Annual General Assembly hmanna ah hian Pu Lalrinkima, Chairman, MAHCO chuan hruiatute inhmelhriattirna leh kalkhawmte lawmna hun a hmang a. Pu AN Barbhuiya, Managing Director chuan kum 2023-24 chhung a hmalakna hrang hrang tarlanna hun hmangin chawhnu lam ah rorelna hun hman a ni.

45th Annual General Assembly-ah hian Mizo kut chhuak Handloom leh Handicraft hrang hrang pho chhuahna tur hmunhma ruahman belh dan tur te, Hualngohmun a Mizoram Handloom & Handicraft Complex din a nih theih nana hmalak dan tur te, Handloom & Handicraft-in hma a sawn zel theih nan Ministry of Tribal Affairs hnuai ah State Tribal Development Cooperative Project thehluh a nih thu te ngaihthlak a ni a. Kum kalta chhung a State Handloom Expo buatsaih a nih dan te ngaihthlak a ni bawk.