875/2024-2025

Aizawl, 20th June, 2024 : Mizoram State Cooperative Union Annual General Assembly vawi 35-na chu vawiin chawhma dar 11:00 khan Dawrpui Multipurpose Centre ah neih a ni a, Cooperation department changtu Minister Pu PC Vanlalruata chuan khuallian niin he hun hi a hmanpui a, Mizoram chhung hmun hrang hrang atangin member thahnem tak an tel a ni.

Khuallian Pu PC Vanlalruata chuan khawmpui palai kalkhawm hmaah thu sawiin Mizoram hmasawnna, a bik takin hmasawnna tluantling atan cooperative movement hi a pawimawh hle a ni a ti a. Mizoram State Cooperative Development Council pawh a rang lama din tum a nih thu sawiin, helama tawnhriat ngah mithiamte thawhpuiin hmalakna mumal taka chhawpchhuah tum a nih thu a sawi a ni. Cooperative Society te chu midangte tana malsawmna nih tum turin a chah a, Society mumal leh rintlak nih tum theuh turin Cooperative Society zawng zawngte a chah a,  Cooperative Principle chu thawhhona tha anih avangin indawmchhuak tawna hmasawn za tura thawhhona tha neih chu an thupui ber tur a ni a ti a, Cooperative Society anga an thawhhona kawngah pawh harsatna a awmlo tura a ngaih thin thu a sawi a. Sawrkar Laipuiah Mizorama Cooperative Movement tih chak lehzual a tul thu leh hemi atana mamawh infrastructure chi hrang hrang an mamawh thu a thlen tawh tih sawiin, anni pawhin ruahmanna kan siam ang angte theihtawp chhuaha tihhlawhtlinsak min tiam thu a sawi bawk a ni.

Mizoram State Cooperative Union Ltd. hi March ni 29, 1975 a din niin tun dinhmunah thawktu nghet 20 leh Provisional Employee 1 an awm a, contract basis a thawk mi 5 ( CEI 3 & Binder 2) an awm bawk a ni. Mizoram State Cooperative Union ah hian Cooperative Society 1400 chuang an awm a, member 54000 chuang an awm bawk a ni. MSCU hian anmahni pualin Bara Bazar, Dawrpui, Aizawl-ah Office-cum-Training Centre changtlung tak an nei a, Chawlhhmun, Aizawl-ah Junior Cooperative Training Centre (JCTC) building tha tak an nei bawk a ni.

Vawiin Annual General Assembly hi Pu K. Lalchamreia, President, MSCU Ltd. In a kaihruai a, Pu R. Lalremsanga, Registrar, Cooperative Societies pawhin thu sawina hun hmangin, Pu K. Lalduhawma, Chief Executive Officer in annual report a pe a,  Pu F. Lalchungnunga, Vice-President, MSCU Ltd. in lawmthu sawina hun hmangin hnu a khar a ni.

Chawhnu lamah rorel inkhawm neih niin kum 2023-2024 Annual Report thlirho anih hnu ah pawm a ni a, kum 2023-2024 Annual Audited Financial Statement sawiho niin an pawm bawk a. Hei bakah hian Mizoram Cooperative Societies Rules, 2012 leh Mizoram State Cooperative Union Bye-Law ennawn ngaite sawiho niin siamthat ngaite an siamtha bawk a ni.