776/2024-2025 

Aizawl, 12.06.2024: Mizoram Cooperative Apex Bank Ltd. chuan vawiin khan Vanapa Hall ah Annual General Assembly vawi 29 na an hmang a. Cooperation Minister Pu P.C. Vanlalruata chuan khuallian niin a hmanpui.

Cooperation Minister chuan cooperative bank pawimawhna sawiin, India state dangte pawhin cooperative bank tha tak tak neiin state sorkar pawhin an sum dahna ber, sorkar rinrawl ber an nih thin thu a sawi a. Mizoram sorkar pawhin a ngaipawimawh thu leh sorkar sum chevel atan Apex Bank hmang tangkai tura inhrilh thin a nih thu a sawi. Tunhnai kum reilote chhunga Mizoram Cooperative Apex Bank in a sum vawn leh peipun kawnga hmasawnna an hmuh zel avangin leh mi engemawzat tan eizawnna an siam chu chhuanawm a ti a. Minister Pu PC Vanlalruata chuan Cooperative bank te bul in tanna, primary cooperative society te chu an hmakhua ngai a, an hmasawnna tur atan hma la zel turin kalkhawmte chu a chah bawk. Minister chuan Society-te hmasawnna atan a bulthut (Grassroot level) ah tan a nih loh chuan thleng sang viau mah ila hmasawnna a ngelnghet theilo thin a ni, a ti. Sawrkar Handholding Policy pawhin Cooperative society tihchangtlun a, a awmloh naah te din a, zirtirna kalpui a hma la turin a inpuahchah mek thu a sawi.

A thu sawi naah Minister hian ‘Mizo hnamte hi hnam intodelh, mi pur hreh kan ni thin a mahse hun engemaw atang khan sorkar a innghah tlat, MLA/Minister te a innghhah tlat hi kan awm ta a. Mahni kutke ngei a ding thei leh turin rilru leh ngaihtuahna kan siam a pawimawh a ni', a ti a. Society te leh mimal in hma an laknaah hlawhtling tak tak tur chuan a tlem thei ang bera Sorkar a innghat a, mahni mimal theihna a ding a hmasawn thei turin a sawm a ni.

Vawiin MCAB inkhawmpui ah hian Cooperative Society thawk tha te hnenah leh Branch thawk tha te hnenah lawmman sem a ni a. Shareholder te hnenah Share Dividend (an bank account ah) pek an ni bawk. He MCB inkhawmpui hawnna inkhawm hi an Chairman Pu Lalnunsanga'n an kaihruai a, chawhnu lamah rorel inkhawm neih chhunzawm a ni.

MCAB hnuaiah hian branch 27 a awm a. ATM 34 (mobile ATM telin) an nei mek bawk. A vaiin thawktu mi 165 an awm a ni.