Vawiin khan Cooperation Minister Pu Lalrinmawia Ralte chuan ZOFISFED (Mizoram Cooperative Fish Farming, Marketing & Processing Federation) Ltd. 14th Annual General Assembly, Tourist Lodge Chaltlang a neihah khuallian niin hun a hmanpui a. Tanrual chu chakna ani a, mimal tumna aiin intelkhawm chuan kan thil tharchhuah te man man zawka hralhna tur zawn leh mamawh dangte pawh nawr a awlsam phah a ni, tiin thawhho thiam a pawimawhzia a sawi a ni.
Khuallian chuan cooperative society-te chu chak zawka kal tur chuan thalaite chawkphur a, an inpholan thiam a pawimawh thu a sawi a. Ram siamtha turin ngaihtuahna hman thiam a ngaih thu te, kan ramin a mamawh leh harsatnate siamthat dan ngaihtuah aia thil tangkai lo tak tak ngaihven kan chin chu sim a tul tawh thu a sawi a. Kalphung tha leh thil tangkai zawk, hmasawnna lam thlira tihdan tha zawk, innovative tak te hmuhchhuah lamah ngaihtuahna hmang ila tiin Cooperation Minister chuan nakin lawka South East Asia ramte nen insumdawn tawnna kawng awlsam taka la inhawng tur te pawh thlir pahin, cooperations member-te chuan tan la zel turin a sawm a ni.
Vawiin hunah hian Pu Sangdingliana IAS, Registrar of Cooperative Societies leh Pu Thlamuana, Secretary, Fisheries ten thu an sawi bakah ZOFISFED Board of Director leh Primary Society atang ten thusawi ngaihthlak a ni bawk. Hun hi Pu F. Lalnienga, ZOFISFED Ltd. Chairman in kaihruaiin, Dr. OP Singh, Managing Director hnen atangin Annual Report ngaihthlak a ni bawk.
ZOFISFED hi kum 1998 khan din niin, tunah hian Primary Society inziak lut zat district hrang hrang atangin 28 an awm a. Fisheries Department kaltlanga Sorkar laipui hmalakna hrang hrang zingah Marine Fisheries, Infrastructure and Post Harvest operations hnuaiah ZOFISFED Ltd. chu lirthei, Ice-Box leh Ice-Plant leh Sangha zawrhna hmun te ngaihtuah sak an ni a. ICDP (Integrated Cooperative Development Programme) hnuaiah kum 2015-16 chhung khan Cooperation Department kaltlanga cheng nuai 8 an dawn chuan Aizawl-ah Vending Kiosk sak hna kalpui mek a ni a. RKVY Scheme hnuaia tanpuina hmuh inhmalakna lian tham tak tak neih a ni bawk.
