No.3066/2021-2022

Aizawl the 20th November,2021 : All India Cooperative Week vawi 68-na kharna inkhawm chu vawiin khan Mizoram State Cooperative Union leh Cooperation Department buatsaihin Dawrpui Multipurpose Hall ah neih a ni. He hunah hian Cooperation Minister Pu C Lalrinsanga chu khuallian niin Pu Lalrinsanga, Registrar, Cooperative Societies chu khual zahawm a ni a. MLA Pu K.Laldawngliana pawhin he hun hi a hmanpui a ni.

Pu C Lalrinsanga chuan Cooperative Movement innghahna leh thiltum hi a ril a, state mai ni lo, ram economy than zelna tur a hril a. Chuvangin, tuna kan kal dan aia tha zawk leh chak leh zual zawkin, kan hmalakna atangin engtinnge ram ei leh bar dinhmun kan siamthat theih ang tih ngaihtuahna pu turin kalkhawmte a chah.  Cooperation Minister chuan Cooperative Movement hi Act leh Rules neia kal a ni a, he movement kalpuitu society hrang hrang te chu Dan tlawhchhan an neih hre renga he Danin kal dan tur a kawhhmuh anga kal turin a chah a. Kil hrang hrang atanga thlira society kal zel dan tura kaihruaitu tha a nih avangin heng Rules leh By Laws te hi ngai pawimawh turin a fuih a ni.

Cooperation Minister chuan Cooperation Movement thil tum te, a innghahna lungphum leh a principle te hi a that em avangin society te tan chauh ni lo, sawrkar, khawtlang leh kohhran huang chhung thlengin a seng luh theih a ni, a ti a. Mipui mimir ten hma kan sawn a, leirem kan rah a, dinhmun tha zawk kan chan theihna tur atan he movement hi din a ni, a ti. Cooperative Week hman zawh tak chu society te leh member zawng zawng te tan intuaitharna ni thei se, an kal zelna tur atana kaihhruaitu tha leh he movement innghahna leh thil tum phawkchhuaka ke an pen tharna atana tangkai a nih theihna turin kalkhawmte leh Cooperative Movement a inhmang zawng zawng te duhsakna Pu C Lalrinsanga chuan a hlan a ni.

Khuallian Pu C Lalrinsanga hian Cooperative Tlangau Special Issue a tlangzarh nghal bawk a ni.

Vawiin programme ah hian hun rei tak Mizoram State Cooperative Union-a hruaitu lo ni tawh thin Pu Lalbiakthanga Pachuau, tun hnaia India President hnen atanga civil mite chawimawina sang Padma Shri Award dawngtu chu lawmpuina hun hman a ni bawk.

All India Cooperative Week kharna inkhawm neih zawh tak hi Pu K.Lalchamreia, President, MSCU chuan a kaihruai a. Pu Zaliankhuma, Chief Executive Officer, MSCU chuan lawmthu sawiin hun hnung a khar a ni.  

Attachment

  • Loading attachment...