1109/2024-2025
Aizawl, the 9th July, 2024: Mizoram State Cooperative Union Ltd. (MSCU) leh Mizoram Cooperative Apex Bank Ltd. (MCAB) tangkawp buatsaih ni 4 (July ni 9-12, 2024) chhung awh tur 'Training on Common Accounting System & Systematic Audit of Primary Agriculture Credit Cooperative Society for Cooperative Officers, Mizoram' tih chu vawiin chawhma dar 10:00 khan MSCU Training Hall, Dawrpuiah tan a ni. A hawnna hun hi Cooperation Minister Pu PC Vanlalruata chuan telpuiin training hi a hawng a ni.

He hun hmanpuitu Cooperation Minister Pu PC Vanlalruata chuan Cooperative Officer-te tana Primary Agriculture Credit Cooperative Society (PACS) enkawl kawnga pawimawhte inzirtirna training buatsaih a ni leh sensote Mizoram Cooperative Apex Bank Ltd. in a tum sak chu lawmawm a tih thu sawiin, "Hmasawn tur leh danglamna thlen turin intuaithar a ngai a, ram changkang apiangin training hi an ngaipawimawh a ni," a ti a. Sawrkar laipui leh State Sawrkarin PACS tihhmasawnna lam a ngaihpawimawh thu sawiin, Sawrkarin society kaltlangin khaw tinah Hand Holding Policy hmangin thlai thar lei a tum a, hemi tur hian society-te din chhoh mek zel a ni a, hengte siamrem leh enkawl hi kan mawhphurhna a nih dawn avangin kan intuaithar angai hle a ni, a ti bawk.

Cooperation Minister chuan sawi chhunzawmin Mizoram ang ram zim tak, a chhunga chengte pawh a tlangpuiin hnam ziarang rualkhai leh khawsak phung inang takah Cooperative Movement a kal fuh chuan hmasawnna nasa taka a thlen thei tih sawiin, kan mutante kan hriata kan tih bo theih chuan Cooperative Movement hian changkanna a thlen dawn a, hemi tur hian kan lo inpuahchah lawk pawh angai a ni, a ti a. Training tura Mizoram hmun hrang hrang atanga kalkhawm Cooperative Officer-te chu Mizoram tana darthlalang an nih thu sawiin, training tha leh hlawhtling tak nei theuh turin duhsakna a hlan a ni.

Thusawitu dang Registrar of Cooperative Societies (RCS) Pu R. Lalremsanga chuan Cooperation Department chu department upa tak UT hunlai atanga kalpui a nih thu sawiin, tun aia sang leh hmasawn zawk kan nih theih nan theihtawp kan chhuahtlan a tul hle a ni, a ti a. Tun dinhmunah PACS 25 te Computerization kalpui mek niin kum tharah a dang 30 ahte kalpui leh tum a ni, a ti a. PACS chu thingtlang mite tana tangkai tak a nih avangin ngaihpawimawh zel tum a ni tih sawiin, society-te chu Sawrkarin Hand Holding Policy kalpui nan hman tangkai a tum thu a sawi a. PACS te'n nakin zelah harsatna an tawh loh nan leh an tlakchiat loh nan sum chevelte mumal leh langtlang taka venpui angai a, hemi tur hian audit ngaihpawimawh niin, Cooperative Officer-te an tangkai hle dawn a ni, a ti a. RCS chuan National Cooperative Database (NCD) mumal leh felfai tak neih kawngah tanlak tlan a tul thu a sawi bawk.

He hun MSCU Training Hall, Dawrpui veng, Aizawla neih hi Deputy Registrar & Course Coordinator Pu K. Lalduhawma, CEO, Mizoram State Cooperative Union Ltd. chuan kaihruaiin kalkhawmte lawmna thu a sawi a, inhmelhriattirna hun hman a ni bawk.

PACS bik audit hi society pangngai audit aiin a danglam avangin Coopertive Officer te'n an hriat fiah lehzual nan training hi buatsaih a ni a. Training-ah hian Cooperation Department hnuaia District hrang hranga Cooperative Audit Officer (CAO) te, Mizoram State Coopertive Union Ltd. (MSCU) hnuaia Cooperative Development Officer (CDO) leh Field Education Officer (FEO) te, National Cooperative Union of India (NCUI) hnuaia Coopertive Education Instructor (CEI) te leh Autonomous District Council hnuai Cooperation Department-a Inspector-te an tel a ni.

Training hi ni 4 (July ni 9-12,2024) chhung awh tur niin faculty pathum Pu H. Remsangpuia, Assistant Grade-I, MCAB, Pu A. Mosshey, AGM (Rtd.), MCAB leh Pu C. Vanlalhruaia, Asst. Registrar, Cooperation Department te'n topic hrang hrang hmangin zirtirna an pe dawn a ni.

Vawiin training hawnna hunah hian Pu Robuanga, Addl. RCS leh Cooperation Department hotu dangte, Pu Lalnunsanga, Chairman, MCAB, Pu K. Lalchamreia, President, MSCU, Pu Lalchungnunga, Vice President, MSCU leh sawm bikte an tel a ni.